R400,000 peyman pour konpansasyon apre dezas Praslin

Gouvernman in pey R400,000 an form konpansasyon pour bann dimoun ki'n ganny afekte par dezas ki ti arive Praslin an Septanm lannen pase.

Sa ti ganny anonse par minis pour Lagrikiltir e Resours Maren, minis William Herminie ler i ti pe reponn kestyon dan Lasanble Nayonal mardi le 25 mars.

 Minis Herminie ti pe reponn kestyon poze par Onorab Francis Cupidon, manm ki'n ganny elekte lo baz proporsyonnel, lo lakantite dimoun ki'n ganny konpansasyon. Minis ti dir ki antou ti annan 68 dimoun ki ti'n fer laplikasyon pou ganny lasistans e ladan 52 in fini ganny asiste. Sa 16 lezot ka i ankor pe ganny konsidere. Lasistans ki'n ganny donnen i varye ant R1,000 a R25,000.

Swivan en lot kestyon Onorab Cupidon lo progranm irigasyon pou anpes linondasyon lo bann laferm Praslin, minis ti devwale ki an kolaborasyon avek Linyon Eropeen, son minister ti'n fini etabli en gran proze drenaz e bann fermye, i ti azoute, ti'n ganny demande pou fer bann sistenm drenaz sekonder. Se selman apre ki sa bann sistenm drenaz sekonder in fini ganny fer ki i ti dir ki mezir kont linondasyon pou vin efektiv.

Minis Herminie ti osi reponn de lezot kestyon, enn lo size proze delo pour bann fermye Cap Samy e lot lo plan pou met beton lo sa morso semen ki zot servi, ki ti ganny demande par Onorab, Mitcy Larue, Baie St Anne Praslin. I ti dir ki sa proze delo ki pou deservi sis fermye pou ganny konplete an Me.  I pa dan plan imedya, i ti fer resorti, pou met beton lo sa semen, me minis ti dir ki i pou kontinyen ganny mentenir e coral fill pou ganny mete lo la pou fer li vin pli bon.

I ti osi koz lo demarkasyon later agrikol Praslin, swivan en lot kestyon poze par Onorab Larue, ki i ti dir in fini ganny fer.  I ti azoute ki i reste ankor enn de travay pou fer pou konplet sa lekzerzis Cap Samy e Côte d'Or.

LINKS