Pour premye fwa sa lannen, zenn rezyon sid i ekspekte zwenn ansanm atraver en seri aktivite ki pou deroul pandan de zour dan distrik Anse Royale.

Sa manifestasyon ki ekspekte regroup bann zenn aze 12 a 35 an sorti dan distrik Anse Royale, Au Cap, Takamaka ek Anse Royale pou deroul Sanmdi le 28 Fevriye ek Dimans le 29 Fevriye, dan zalantour lekol Segonder, Sant Kominoter Anse Royale e osi lo lans anfas avek bazar sa distrik.

Sa de zour aktivite pou demare Sanmdi apartir 9er bomaten avek en deba ki annan pour tit «Youth and Community ». Pandan sa deba ki pou fer kot Sant Kominoter Anse Royale bann zenn pou ganny sans diskit lo zot rol dan kominote e anmenmtan en lot group zenn pou ede avek travay kominoter dan bann diferan landrwa piblik sa distrik.

Lazournen Sanmdi pou termin avek en sware varyete apartir 7.30 aswar kot Sant Kominoter.

Lazournen Dimans ki pou komans depi 10 er bomaten pou dominen par bann aktivite sportif parey beach volleyball ek foutbol, tug of war, pillow fight. Lo progranm pou osi annan en seri aktivite tradisyonnel parey paryaz larou ek serk, kalamojonm, konpetisyon plis koko e osi paryaz ranpli boutey. Pou osi annan en demonstrasyon kick boxing ki  pou swiv par plizyer performans kiltirel.

Aktivite Dimans pou termin avek prezantasyon pri pour bann diferan konpetisyon.

Sa lazournen aktivite ki annan pour bi ankouraz plis zenn pou siport e partisip aktivman  dan bann aktivite rezyonnal i osi en fason pour ed bann zenn fer nouvo zanmi e partaz diferan leksperyans.

Sa manifestasyon, ki ekspekte vwar partisipasyon zenn sorti dan lezot rezyon, in ganny organize par departman lazenes an kolaborasyon avek ladministrater distrik, travayer lazenes, komite Youth Action Team sa kat distrik rezyon sid.

Avek bi kontinyen promot partisipasyon lamas bann zenn, sa manifestasyon i ekspekte fer dan lezot rezyon atraver pei.

LINKS