Loperasyon kont vol ek vyolans

Plizyer lobze vole i ganny retrouve

Lapolis in dir ki zot satisfe avek zot loperasyon kont vol ek vyolans, sirtou apre ki zot in arive aret serten kriminel ki ti pe angaz zot dan bann aktivite ilegal.

Enn parmi, Brian Alcindor, in pas devan lakour kot in ganny trouve koupab pour vol popriyete en koup etranze kot lotel Lazare Picault, Baie Lazare. Sa zonm in kondann 8 an prizon.

Letan i ti pe donn sa bann lenformasyon avek lapres Vandredi le 28 Me, Sef Sirentandan Andre Valmont ti dir ki lanket ki pe kontinyen in deza montre ki serten bann dimoun ki an detansyon i enplike dan bann lezot lensidan vol ek vyolans ki'n arive resaman.

Sef Sirentandan Valmont in dir ki menm avek progre ki lapolis in realize, manm piblik i devret konpran ki sa pti lafors ki annan pa pou kapab kouver partou anmenm tan. Me i ti dir ki lapolis i vreman apresye sipor ki zot pe gannyen avek manm piblik e zot konsyan ki san led piblik zot pa ti pou kapab fer otan ki sa ki zot in fer ziska prezan.

"Mon oule profit sa lokazyon pour remersye bann dimoun ki'n servi byen sa nimero 323333, e ziska vandredi nou ankor pe ganny lenformasyon konkret lo bann lensidan. Sa i montre ki manm piblik i ansanm avek nou pour ede detekte bann ki koupab pour sa bann krim," Msye Valmont ti dir.

I ti osi dir ki menm si tou dernyenman in annan lenpresyon ki i annan en logmantasyon dan lakantite krim, sa pa'n leka. I ti dir ki okontrer la kantite krim pe diminyen gras a sa loperasyon e i annan bokou plis ka, menm bann ki'n arive depi enpe letan, ki pe ganny raporte par manm piblik.

Swivan konsern ki lapolis ansanm avek manm lafors defans pe bat dimoun obor semen, Msye Valmont in dir ki i zot devwar pour vwar ki sa bann dimoun i fer obor semen, me anmenmtan zot pe fer sir ki zot bann staf i ganny byen gide lo fason pour apros sa bann dimoun.

I ti azoute ki souvannfwa sa bann dimoun pa korpere.

Msye Valmont in dir ki sa loperasyon konzwent ant lapolis ek lafors defans pa senpleman pour aret e fouy dan bann transpor ensi ki lo bann dimoun sispe pour detekte okenn zouti danzere dan zot posesyon, me pour osi detekte bann kriminel ki pe kontinyen teroriz pei.

Sa loperasyon, i ti dir, pou kontinyen e i pou ganny ranforsi, sirtou aswar.

Antretan, lapolis, pandan lafouy fer dan bann lakaz, in retrouv en serten kantite lobze ek zouti avek serten bann dimoun ki an detansyon. Parmi i telefonn mobil, charger, bizou ki enkli lasenn ek mont, kamera, larzan an deviz etranzer, gran kouto ek lars. I osi annan en zouti ki servi pour mont poto elektrik e sa ti ganny trouve dan en lafouy kot en lakour.

Lapolis pe demann manm piblik ki'n perdi keksoz pour vin idantifye si sa bann lobze i pour zot.

LINKS