Lanbyans kreol dan bazar

En varyete aktivite ti egey bann dimoun dan bazar Merkredi 29 Oktob lazournen pandan en gran Fiesta Kreol.

Bann aktivite ki ti'n demare depi bomaten ti resevwar en pli gran lafoul ver lo apremidi.

Spesyal pour sa fiesta ti lefe ki bann vander travay artizanal pa ti dan zot magazen labitid, me zot ti'n alinyen anba dan bazar pour vann zot bann prodwi.

Osi anvant ti en varyete fri, legim e gro manze a bann pri tre rezonnab.

Pandan sa fiesta manm piblik ti osi ganny sans vwar en defile lanmod fer par en group zenn avek serten dezabilite. Malgre zot dezabilite, sa bann zenn ti met sourir lo figir bokou bann dimoun prezan an paradan dan en varyete stil lenz.

Bann resanz pour sa defile ti en kontribisyon ‘Curiosity Boutique’ ki sitiye anler dan bazar.

Pour bann ki ti lafen, zot ti ganny sans degiste diferan pla kreol kot restoran Jolie Rose lanmenm anler dan bazar ensi ki en varyete deser kreol, koman salad mang ek nouga bannann.

Animasyon lanmizik ti met bann dimoun dan sa lanbyans kreol e ti'n menm atir bann danser tel ki bann pti zanfan lekol maternel St Joseph ki ti’n vin vizit bazar.

LINKS