Selebrasyon dan kad 18enm edisyon Festival Kreol ti ariv a son lafen Vandredi le 31 Oktob,  avek spektak mizikal Lakadans ki ti deroul Stad Lanmizik ek en Bal Asosye kot Lenstiti Kreol, Au Cap.

Lakadans, sa aktivite anyel lo kalandriye Festival Kreol, ti vwar partisipasyon plizyer artis rezyonnal parey Serge Lebrasse sorti Maurice, Jaojoby sorti Madagascar ek Malesh sorti Comores.

Parmi bann artis Seselwa popiler ki ti performen sa swar ti Jean-Marc Volcy, Joseph Sinon, Jahrimba, Marc Dubel, Mervin Camille ek Michel Marengo.

Parmi bann performans sa swar ki ti fer lodyans bouze e Stad Lanmizik vin pli vivan ti letan Serge Lebrasse ti mont lo lasenn avek son bann nimero parey Ti Pol kouper kann.

Sa menm swar ti osi annan sa fame Bal Asosye ki ti ale ziska son lannmen granmaten.Parey in leka dan bann lannen presedan, sa aktivite ti akey en gran lafoul dimoun ki ti'n vin dir orevwar Festival Kreol 2003 e donn randevou lannen prosenn pour 19enm edisyon sa gran manifestasyon kiltirel.

LINKS