Minister Ledikasyon in dir ki i satisfe avek son progranm renovasyon lo bann lekol.

Sa i vin apre ki sa minister pe envesti plis ki 1.7 milyon roupi dan travay renovasyon lo lekol Cascade, Plaisance ek Bel Eau Annexe.

Dan sa sonm, 497,000 roupi in al dan travay renovasyon lo lekol Cascade ki'n enkli sanzman twa ek plafon trwa blok sa lekol e osi met nouvo fàn ek lalimyer.

Tou travay renovasyon lo bann laklas in antreprann par lakonpannyen konstriksyon M&M Services.

En lot konponan travay renovasyon lo lekol Cascade ti konstriksyon en nouvo lasal-a-manze ki ti komanse an Zen 2002 e konplete an Novanm lannen pase. Sa proze in kout gouvernman 250,000 roupi e in ganny antreprann par lakonpannyen LKJ.

Dapre direkter sa lekol Cyril Pillay, sa bann travay ti neseser pour kree en pli bon lanvironnman lekol pour bann zanfan etidye.

En lot proze ki gouvernman in envesti en sonm 680,000 roupi i lagrandisman lakres Plaisance. Travay pour konstrir sa nouvo lakres ki pou annan trwa nouvo laklas ti komanse an Novanm lannen pase e i ekspkete konplete an Out sa lannen.

Sa proze pe ganny antreprann par lakonpannyen Herman Maria.

Direktris sa lekol, Madanm Odile Octave, in dir ki lagrandisman sa lakres a permet plis lespas pour bann etidyan.

Travay renovasyon kot lekol Bel Eau Annexe, ki pou konpri met bann nouvo twalet  i ekspekte komanse pandan vakans Out. Dezyenm faz travay renovasyon ki pou enkli fer serten louvraz lo twa ek plafon i ekspekte komanse en pti pe plitar. I osi annan plan pour repenn andeor sa lekol an antye.

Sa proze an antye pe kout gouvernman 280,000 roupi e i ekspekte konplete an Septanm sa lannen.

Direktris lekol Bel Eau Annexe, Madanm Susan Charles in dir ki i annan lezot travay renovasyon ki devret ganny fer parey lenstalasyon baro pour asir sekirite bann etidyan ensi ki ansennyan. I ti dir ki dan lepase in annan bokou ka vandalizm e plis mezir sekirite i devret ganny pran.

Lo son kote direkter plan ek lenplimantasyon proze dan Minister Ledikasyon ek Lazenes, Msye Yves Choppy ki ti vizit sa trwa lekol semenn pase avek en delegasyon son minister pou vwar bann travay ki'n ganny fer, in dir ki i satisfe avek fason ki travay renovasyon pe ale.

In osi anons lezot travay renovasyon ki Minister Ledikasyon pe al antreprann sa lannen, ki enkli remet plafon lo lekol segonder English River e osi sanz twa lo lekol Glacis.

LINKS