Konstriksyon nouvo klinik Beau Vallon i en priorite lo lalis proze Minister Lasante pour sa lannen.

Sa ti anonse par minis responsab pour sa minister, Msye Patrick Pillay, pandan sesyon reponn kestyon dan Lasanble Nasyonal Mardi le 1 Zilyet, letan i ti pe reponn kestyon Onorab Isabelle Joubert lo progre ki son minister in fer lo finansman e konstriksyon sant lasante distrik Beau Vallon.

Minis Pillay ti dir ki in annan retar pour konmans sa proze, ki ti ekspekte demare an Novanm sa lannen, pour donn bann zabitan sa distrik ek lezot dimoun sans fer okenn sizesyon lo ki mannyer zot ti a kontan vwar striktir, larsitektir ek bann servis ki sa sant lasante pou ofer e osi amelyor sa plan ki ti'n ganny drafte.

Minis Pillay in donn garanti ki swivan laprouvasyon lotorite plan, konstriksyon i ekspekte konmanse boner lannen prosenn.

Swivan plizyer lezot kestyon par bann manm onorab lo plan Minister Lasante pou konstrir en nouvo sant lasante pour zot distrik, Minis Pillay ti anonse ki dan limedya napa okenn plan pour konstrir nouvo sant lasante apard ki sa enn Beau Vallon ek La Digue.

Me in tou-d-menm fer resorti ki dan sa prosen senk an i dan gran plan Minister Lasante pour konstrir en nouvo sant lasante dan distirk Baie Lazare, Grand Anse Praslin, Corgate Estate ek Anse Royale.

Lo kote sant lasante distrik Baie Lazare, i ti dir dan limedya i annan nesesite revwar kalite servis ek lantrennman pour bann travayer sa sant.

Minis Pillay ti osi anonse ki dan limedya serten travay renovasyon lo sa klinik pe al ganny antreprann.

Lefe ki sa sant lasante i deza dan en landrwa sere, minis ti dir ki en lot sit pli ideal pe ganny idantifye pour ofer serten servis spesyalize ki sa sant pa pe ofer pour lemoman.

Minis Pillay ti dir ki klinik Baie Lazare ek lopital La Digue i parmi de distrik ki Minister†Lasante in swazir pour fer en letid pilot lo lentrodiksyon 'family health nurse'.

Sa, i ti dir, avek bi ankouraz plis enteraksyon ant kominote avek lezot travayer sa minister.

Minis in osi dir ki son minister napa lentansyon enstal okenn fasilite medikal debaz pour zabitan Sans Souci me ki bann zabitan sa landrwa i bezwen kontinyen servi klinik English River ek Corgat Estate.

Minis Pillay in tou-d-menm dir ki i annan nesesite pour fer en letid Sans Souci pour vwar ki kantite dimoun ki pou benefisye avek serten servis lasante debaz menm si pa lo en baz toulezour.

LINKS