Manm Lasanble Nasyonal in felisit Brigad Tenny Dife pour sa ki zot in dekri konman son travay remarkab ki in fer toudilon son legzistans dan servis piblik, malgre en mank lekipman ek transpor, parmi lezot kontrent.

Malgre retar ki zot gannyen parfwa, ki pa toultan zot lafot, bann ponpye in toultan donn en bon servis, bann manm onorab in admet.

Sa bann mo felisitasyon ti ganny sorti pandan deba lo en mosyon sa semenn dan Lasanble ki demande ki gouvernman i enstal en stasyon tenny dife dan Sid Mahe.

Sa mosyon ti ganny prezante par manm elekte pour Anse Royale Onorab Barry Faure.

Sete manm elekte pour Baie Lazare, Onorab Robert Georges, ki ti premye pour felisit Brigad Tenny Dife pour son bon servis, e sa ti ganny siporte par lezot manm ki ti pran laparol apre, kiswa dan parti mazoriter oubyen dan lopozisyon.

En lot mosyon ki bann manm ti debat lola pandan sa menm sesyon ti demande ki Gard Lakot Seychelles i etabli en baz lo bann zil elwanyen pour protez nou zón ekonomik. Sa enn mosyon ti ganny prezante par Lider Lopozisyon, Onorab Wavel Ramkalawan.

Toulede mosyon ti ganny aprouve alinanimite.

LINKS