Sa delegasyon zis avan zot pran bato kot baz Gard Lakot vandredi bomaten pour zot al La Digue

En karantenn dimoun avek dezabilite sorti dan plizyer distrik ti kit Mahe Vandredi le 7 Me,  pour al pas en wikenn avek zot bann  konfrer Pralinwa ek Digwa.

Zot akonpannyen par bann manm egzekitiv Lasosiasyon group sipor pour dimoun avek dezabilite.

Sa delegasyon, ki pou kanp dan lekol La Digue, i ekspekte pran par dan en seri aktivite sportif ek kiltirel lo sa zil.

Sa kanpman i tonm dan kad progranm lesanz ant dimoun avek dezabilite lo La Digue, Praslin ek Mahe.

Pandan sa wikenn, sa bann manm egzekitif group sipor pour dimoun avek dezabilite lo Mahe i ekspekte organiz en latelye ki a permet reprezantan group sipor lo La Digue konn plis lo rol sa lasosiasyon.

Zot pou osi fer diskisyon e esanz lide lo bann aktivite ki pou ganny organize pandan lannen.

Bann partisipan sa latelye pou osi desid lo en logo, moto ek en lim pour sa lasosiasyon ki ekspekte lanse ofisyelman an Zilyet.

Sezour sa delegasyon pou termin avek en seri aktivite sportif lo lans anfas avek lekol La Digue. Bann dimoun avek dezabilite pou kapab montre zot abilite dan aktivite parey domino e osi serten performans kiltirel.

Dimans bomaten sa delegasyon pou osi partisip dan lanmes.

LINKS