Gouvernman in anonse ki dan sa prosen senk an, distrik Anse Boileau pou benefisye avek trwa gran proze konstriksyon lakaz pour lwe ek flat deliks pour vann, pour ede reponn bezwen sa 232 aplikan ki ankor lo lalis.

Minis pour Litilizasyon Later e Labita, Msye Joseph Belmont, ti fer sa lanons ler i ti pe reponn kestyon dan Lasanble Nasyonal sa semenn. Kestyon lo detay plan pour konstrir lakaz Anse Boileau ti ganny demande par Manm Lasanble pour sa distrik, Onorab Andre Pool.

Minis Belmont ti dir ki enn sa proze lakaz pou ganny fer dan zalantour kordgard kot en douzenn lakaz pou ganny konstrir e vi ki sa morso later i sitie dan en landrwa ki annan en valer estetik, gouvernman pe osi anvizaze konstrir bann flat deliks.

English River i en lot distrik kot kontriksyon flat deliks pou ganny fer.

En lot gran proze devlopman pour Anse Boileau i kontinyasyon faz trwa Caiman Estate, kot ankor plizyer lakaz ek flat deliks pou ganny konstri lo en morso 30 ektar later.

Minis ti dir ki gouvernman pou osi met detrwa kare dekote pour vann avek bann dimoun ki enterese. 

Dan Gravye, Anse Louis i en lot landrwa kot deza gouvernman in fini idantifye serten kare later pour vann. Konstriksyon swa bann flat oubyen "duplex" in osi prevwar lo sis lezot kare.

An sa ki konsern demann pour loan, ki ti vin dan en kestyon siplemanter demande par menm Onorab, minis ti dir ki ziska aprezan in annan 50 demann, dan ki 15 ka pli irzan in fini ganny konsidere. Set parmi in fini ganny zot loan e senk lezot ti'n demann SHDC pour konstrir zot lakaz.

LINKS