Vis-Prezidan James Michel

Nou prezant zot diskour ki Vis-Prezidan James Michel ti fer dan Lasanble Nasyonal Mardi apre midi (9/12/2003) an repons komanter fer par bann manm pandan deba lo Bidze 2004. Bidze 2004 ti ganny presante devan lasanble Mardi le 2 Desanm par Vis-Prezidan Michel, dan son kapasite koman Minis Finans, e i ti ganny aprouve son Mardi answit.

Mardi pase (2/12/2003) mon ti prezant bidze nasyonal devan en Lasanble plen e pandan tou sa bann zour mon'n swiv deba, mon'n ekout tou dimoun tre atantivman, manm Lopozisyon e manm dan parti mazoriter e i zis regretan ozordi letan ki mon pe prezant mon konklizyon lo deba, mon summing up, mon pa vwar en manm Lopozisyon prezan. Me toudmenm Msye Speaker mon oule avan tou remersye manm Lasanble ki'n donn zot sipor pour nou propozisyon Bidze 2004. 

Mon'n swiv sa deba tre atantivman, mon'n kontan ekout bann kontribisyon konstriktiv sirtou sorti kot parti mazoriter. Mon'n osi ekout zot kritik sirtou lo kote servis e labi e keksoz ki dapre zot progranm zot ti a kontan pour zot vwar pe antreprann dan zot distrik.

Bann manm Lasanble, sirtou lo kote mazoriter, i santi sa bidze i tonm byen dan nou plan reform makro-ekonomik pour permet nou devlop en lekonomi pli modern e pli solid. 

Msye Speaker i pa mon lentansyon vin fer politik bon marse oubyen reponn a bann latak personnel sorti kot serten manm Lopozisyon. Annefe dan mon summing up mon pou prezant lepep Seselwa ankor enn fwa avek bann argiman byen fonde an sipor bidze ki mon ti prezante Mardi pase (2/12/2003).

Sirplis

Nou’n vwar nou pe komans ganny en sirplis dan bidze, ki bon pour nou sityasyon deviz, me Lopozisyon, parey labitid n’atak nou, e ankor enn fwa letan nou pe enplemant en progranm pour reform nou lekonomi, zot dir nou ki tou i mal, me zot pa propoz okenn alternativ ou okenn lezot solisyon, eksepte dir ankor enn fwa ki gouvernman i bezwen fer en investment code, konmsi sa i en baton mazik ki pour rezourd tou problenm ki annan dan Seychelles. 

Parey sa group biznesmenn Belzik i’n konfirmen, e ki ti raporte dan Indian Ocean Newsletter, Lopozisyon isi i paret napa en stratezi. Zot largiman i montre kontradiksyon dan SNP. Enn i dir sa ki gouvernman pe fer i sa ki zot ti demande, lot i kritik sa menm ketsoz ki swa-di-zan zot menm ki ti oule. Zot menm zot konfize, e anka zot pe konfiz lezot dimoun, alor i mon devwar pour montre klerman ki i annan en gran diferans ant SNP e SPPF.

Apard kontradiksyon dan zot prop filozofi, ti kler ki serten de zot ti’n ganny direktiv pour fer politik popolis, politik bon marse avek largiman ki mank sibstans. Zot i’n vin zwe lo lemosyon dimoun, bann malad, pansyoner, zanfan, zis pour ganny gen politik. I domaz akoz bidze en pei i en ketsoz serye akoz i konsern larzan ki gouvernman i kolekte pour fer marse lopital, lekol, pour lenstalasyon delo, tranpor piblik, fer lakaz e anvway etidyan deor, saler travayer servis piblik, eksetera. Mon ti pe ekspekte ki la koman nou pe komans vwar sikse dan nou progranm makro-ekonomik, pour fer nou lekonomi pli solid, omwen dan sa enn lokazyon zot ti a anmenn deba pozitiv, pour ki ansanm nou a kapab realiz nou Seychelles Dream.

Abolisyon Trades tax

Monn dir ki nou pe komans vwar bon rezilta bann mezir fiskal, me i paret mwan ki pour Lopozisyon sa zafer GST i’n vin en bon seval pour zot fwete zanmen fini. Mon ti a kontan re-eksplik sa kestyon GST e mon panse i a va dernyen fwa ki Lopozisyon a fwet sa seval, akoz mon santi ki zot menm zot pe komans fatige fwet menm seval tou-le-zour. Msye Spiker, i annan plis ki 2-an depi ki nou ti pe etidye aboli sistenm Trades Tax e ranplas li par en lot sistenm taks ki dan serten lezot pei i apel VAT e serten lezot GST, avek serten varyasyon dan son fonksyonnman. Sa i donn nou en sistenm taks ki an armoni avek bann lorganizasyon komers enternasyonal ki nou ti pe zwenn. Dan nou demars pour vin manm SADEC, COMESA e WTO sa ti enn bann lobligasyon ki nou bezwen fer pour armoniz nou sistenm avek lezot pei. Chamber of Commerce ti osi prekoniz en nouvo sistenm taks. Preski tou pei dan lemonn i’n adopte ou pe adopte GST ou VAT pour ranplas Trades Tax ou customs duty. Mon repete ki sa GST pe ranplas sistenm Trades Tax, e se Trades Tax ki pour gradyelman disparet pandan sa 3-an ki pe vini. GST pour bezwen reste.

Mon oule fer rapel Lopozisyon ki depi le 1 Zilyet 2003 napa lefe GST lo ketsoz esansyel parey diri, disik, delwil, ponm-de-ter. E parey nou ti dir nou pou fer, detrwa semenn apre nou ti komans retir ankor Trades Tax lo lezot ketsoz, par ekzanp prodwi pour pti baba e fortifyan. E Gazet Ofisyel i’n fini pibliy en gran lalis anviron 3500 aytenm lo ki Trades Tax pour swa retire konpletman ouswa diminyen, e kan nou pou fer sa. Nou anvizaze ki ver 2006 Trades Tax lo preski tou aytenm a minimal. Tou ketsoz i piblik e dan kler, mon pa vwar rezon pour Lopozisyon kontinyen konfiz dimoun avek sa zafer GST. Ler problenm likidite a’n regle, avek en konbinezon disiplin fiscal e mezir moneter, Trades Tax a ganny phase out pour laplipar komodite. Kou’d lavi a retourn a son nivo normal. Sa monn deza eksplike e tou Seselwa i konnen ki sa i en moman kot nou bezwen vin pli solider anver nou pei ek nou lavenir.

Dir nenport kwa

I fasil pour Lopozisyon dir nenport kwa, me ler ou dan Gouvernman ou bezwen pe touzour rod fason pour fer ketsoz pli byen, re-aranze ler fodre, korize, sanze ler i fodre pour ki nou vin pli solid e pour ki nou pep i kontinyen benefisye rezilta nou progre. Mon ti vin devan Lasanble pour prezant en Bidze realis, en Bidze serye, en Bidze ki dekoul dan nou progranm MERP ki nou ti prezante ek lepep an Zen. Ler mon ti prezant mon diskour Bidze lannen pase mon ti dir ki en lekip, apre konsiltasyon neseser,  pou travay lo en progranm reform ekonomik, e ki nou pou fer sa akoz nou oule etabli en pli bon baz lekonomi, en lekonomi pli modern pour nou pei, anliny avek sa ki pe arrive dan lemon ozordi.

Mon’n vin devan zot an-tout lonekte, fransiz. Mon ti eksplike ki nou ti annan difikilte, akoz nou annan sa difikilte e ki nou pe fer pour rezourd bann problenm. Nou’n dir aplizyer lokazyon e nou tou nou vwar, ki nou’n depans bokou, nou’n depans dan en kantite lakaz, dan semen ki nou’n konstrir partou atraver montany, dan ledikasyon, dan anvway pasyan sonyen deor. Nou’n depans lo nou dimoun, nou’n envestir pour ki nou anmenn sanzman pli vitman dan lavi nou popilasyon. Nou ti fek vin endepandan, e Angle pa ti kit preski nanryen ek nou. Nou ti santi ti neseser anmenn lepanwisman pour nou dimoun, se pour sa rezon ki ozordi nou annan en lendistri lapes ki ase byen devlope.

Lenportasyon canned tuna sorti Sesel pour antre dan Linyon Eropeen i 12% market share, ki ekivalan 56,472 tonn. Langleter i enport 52% son konsomasyon canned tuna, swa 29,400 tonn, sorti Sesel. Nou annan en lakonpanyen avyon Air Seychelles lo lekel nou prop Seselwa pe travay. Nou annan nou tenker e 2 lezot pe konstrir. Nou annan en kantite lakonplisman tanzib, ki la pour nou vwar e touse, e ki fer nou sa pei avek pli bon progre imen Lafrik e 36enm dan lemonn, ki Lopozisyon i aksepte ou byen non. I en lakonplisman ki ganny rekonnet dan lemon e ki fer Seselwa fyer.

Nou’n devlop vit. Nasyon Zini i kwar ki apard larzan, en pep i  bezwen en bon sistenm ledikasyon, en bon nivo lasante, en bon lanvironnman e loportinite pour tou sitwayen devlope. Se sa ki nou’n fer. Pour reponn Msye Bernard Georges, nou dan gouvernman nou pa kapab zis pran larzan lepep e kit labank. Ler nou gouvernman i ramas larzan i servi sa larzan pour donn servis e fer devlopman pour benefis tou popilasyon. Si nou pa depans larzan, vre pour reste plis labank dan rezerv. Me ki ou pour dir avek sa dimoun ki pe esper en lakaz, sa zanfan ki dan en vye lekol, sa zenn ki’n kalifye pour en letid aletranze, ouswa sa pasyan ki son ka n’aprouve par Medical Board pour anvway li trete deor.

Fer ketsoz enpe diferan

Msye Spiker, nou’n fini fer bann gran lenvestisman ki nou ti dir nou pou fer, e ler n’arive pour nou fer ketsoz enpe diferan si nou oule ki nou pep i kontinyen zwir tou sa bann benefis ki nou’n anmenn dan lavi nou dimoun, e ki ozordi petet nou take it for granted  parey Angle i dir. Sa ki esansyel pour nou konpran se ki tou sa bann ketsoz ki nou’n fer, ki nou’n akonpli, e ki ozordi petet i annan parmi nou ki kwar ki pa tou Seselwa ki devret annan, tousala nou bezwen depans larzan pour fer.

Si mon konpran byen parol Msye Bernard Georges, nou pa ti devret pe fer sa kantite devlopman, sa vedir pa fer lakaz, pa fer bokou semen, ti pour napa bann konpleks sportif pour nou zenn devlop zot talan, ti pour napa en nouvo stasyon elektrisite, Air Seychelles pa ti pour ekziste, ti pour napa Seychelles Pride, annou pa oubliye akoz son gouvernman pa ti pour met larzan ladan. Sa i les kwar ki son gouvernman ti pou anvway mwens etidyan deor, ti pou napa pasyan ki ti pour al trete deor, eksetera. Aprezan mon konpran akoz i ti dir Vandredi pase ki dan son kanpany eleksyon Les Mamelles i ti promet zis pour fer peron Basen Ble.  Ler lezot distrik pe al devan i paret mwan Les Mamelles pour ganny zis en peron dan 5-an. La ankor en diferans ant SPPF e SNP.

Get lwen   

Nou bezwen pe touzour get lwen, e 1-an apre ki mon ti dir ki en lekip pe travay lo en nouvo progranm makro-ekonomik ki pour fer nou pli solid, mon ti kontan pour mwan retourn devan sa Lasanble Mardi pase pour dir ki nou pe komans vwar bon rezilta. Mon sir nou a kapab sirmont nou difikilte pli vit si nou tou nou pran nou responsabilite e ansanm nou kontinyen ofer nou kontribisyon pour anmenn Sesel pli devan. Nou lekonomi e benefis sosyal ki sa lekonomi i soutenir i en zafer popilasyon an antye. I demann en sanzman latitid ek mantalite, nou devret pran nou responsabilite pour fer li marse. Malerezman mon pa pe vwar sa sanzman dan Lopozisyon.

Mon annan konfyans ki nou pour sirmont bann difikilte, e ki tou Seselwa i annan sa lespwar, akoz a sak fwa ki nou met nou ansanm nou achieve sa ki nou dir nou bezwen fer. Sa sirplis ki monn dir nou pou gannyen dan Bidze 2003 e avek ankor sirplis dan Bidze 2004 pe met nou dan en sityasyon kot nou pe retir presyon lo demann pour deviz, pour ki i a annan plis foreks pour lezot dimoun e sekter prive. Monn osi dir ki nou pe reisi dan nou demars pour nou ganny plis letan pour rann nou bann loan, sa menm sa bann loan ki’n permet nou realiz en bon pe lenvestisman ki enportan pour nou lavenir. Kan lendistri touris a repran e avek plis leksportasyon, sa anmenn plis deviz ankor dan sistenm.

Msye Spiker, mon oule vwar en Sesel kot nou kontinyen envestir dan nou dimoun, e la mon oule dir the real people parey Msye Herminie ti dir, e anmenm-tan annan en lekonomi byen lwile, e ki kontinyen mars byen lo limenm, en lekonomi modern tout an respektan nou prensip fondamantal lo lazistis sosyal e ki pa kit person deryer. Mon donn mon langazman ki mon pour kontinyen travay pour sa lobzektif.

Lefikasite dan servis piblik

Msye Spiker, Manm Lasanble lo kote SPPF e Lopozisyon souvan d’fwa i’n koz lo nesesite pour annan plis lefikasite dan servis piblik, ki vedir pei i bezwen rod nouvo fason fer ketsoz, annan pli bon zesyon e pli bon lorganizasyon. Lefikasite i vedir servi resours ki nou annan o-maksimonm. Bidze Lasante e Ledikasyon pe montre en rediksyon sirtou akoz an 2003 nou’n pey en bon pe bann aryeraz. Me i’n annan en bon lekzersis pour koup gaspiyaz e anmenm-tan Minister Lasante a kapab depans plis lo latizann e dan servis lasante dan distrik.

I pa sifi zis depanse pour kapab donn en bon servis. Manyer nou donn sa servis i osi enportan. De lot kote nou kapab donn plis larzan e servis pa amelyore, e dimoun i konplent menm. Mwan mon rekonnet travay ekzanpler ki mazorite nou travayer lasante pe fer pour donn en bon servis, menm avek kontrent ki zot annan. Problenm dan lasante i pa sa 4% rediksyon dan Bdize 2004 konpare avek 2003 apre ki nou’n repey bann aryeraz ki ti annan dan Bidze 2003. En gran parti problenm dan sa minister i sorti kot serten aktivis SNP dan sa minister menm, ki deside fer sabotaz pour gouvernman ganny blanmen e lepep vin anmer. I annan parmi sa bann aktivis ki enfklyans lezot, zot pas zot letan fer demagozi politik, i annan ki menm fer sabotaz lekipman, pa maintain lekipman byen, ki refize fer X-ray  en pasyan zis akoz 4-er i’n sonnen, e lezot ki fer papye pour latizann ki zot konnen napa lopital e zot pa ni menm propoz en lot ki annan. Sa i en lekzanp kot ketsoz i bezwen sanze a lavenir. Dimoun i bezwen pran zot responsabilite, fer zot travay onetman, avek konsyans.

Mon oule pran en lot minister, Ledikasyon, kot n’oun reisi anmenn en amelyorasyon dan Bidze me nou pour kontinyen asire ki kalite ledikasyon i ogmante, plis etidyan kontinyen zot letid, e ki bann lekol i ganny bann materyo ki zot bezwen pour lansenyman. I annan meyer kondisyon travay pour bann ansenyan ki pe form bann zenerasyon fitir. I osi en lakonplisman ler nou arrive fer plis ketsoz avek menm kantite ou mwens larzan.    

Lider Lopozisyon pa’n koz bokou lo Bidze safwasi akoz i’n plito vin la pour esplik nou ki aprezan zot en bann liberal. Mon kontan ki omwen i’n admet sa an piblik, e nasyon Seselwa plitar a deside si zot oule en gouvernman ki pour depans mwens larzan lo son pep e kot gro pwason a lib pour manz pti pwason dan biznes. Sa mon a les pour lepep Seselwa. Lider Lopozisyon n’osi rekonnet ki nou annan en lazenes ki entelizan. Mon sir i pe koz lo sa lazenes ki’n al lekol e devlope pandan sa dernyen 26-an, e mon oule dir li ki en pep i kapab entelizan, me si napa en sistenm ledikasyon ki permet zenn epanwir e kree lezot debousman pli tar pour zot asplik zot lentelizans, parey nou bann zenn dan Sesel, zot pa pour kapab devlope e montre sa lentelizans. Avan SPPF ti vin opouvwar ti napa en sistenm ledikasyon ki donn bann zanfan e lazenes menm loportinite pour devlop zot lentelizans. Ozordi nou annan en bon sistenm ledikasyon ki napa dan bokou pei. Dan Seychelles avan ti napa sa sistenm, e sa menm kalite dimoun ki ti diriz nou sosyete sa lepok ozordi nou vwar dimoun avek menm filozofi dan sa parti Lopozisyon dan Lasanble ki pa dakor ki gouvernman i fer tro depans piblik. Ankor enn fwa zot a ganny zize par sa zenn manman, sa zenn papa ki fek komans en fanmiy e ki oule zot zanfan osi i benefisye ek loportinite egal ki nou sistenm ledikasyon i ofer tou pti Seselwa.

Liberalizasyon e privatizasyon

Msye Spiker, i neseser ki mon koz ankor lo sa kestyon liberalizasyon e privatizasyon, akoz sa 2 size i dan nou progranm reform ekonomik e i osi size ki lemonn pe debat bokou lola. Nou koman en gouvernman responsab, nou fer sir nou veye ki pe pase dan lemonn, akoz i kapab annan gran lenflyans lo nou pti pei. Nou pa dakor avek en liberalizasyon sovaz akoz nou bezwen veye ki nou bann biznes, sirtou pti biznes, pa ganny avale par sa ki pli gro. Pour nou liberalizasyon i en prosesis, pa en levennman kot en zour nek nou leve e anonse ki nou pe larg tou ketsoz e les biznes manz kanmarad. Nou oule fer sir ki lentere tou dimoun, sirtou bann dimoun ordiner, i pas avan tou.

Lo privatizasyon ki Lopozisyon pe demande ki nou privatiz tou bann byen leta en sel kou, la osi nou pe fer sanzman san ki nou pep, nou bann konsomater, i ganny afekte. Lopozisyon i kontan mansyonn Moris koman lekzanp, en pei kot i annan deferan valer ek nou isi Sesel. Sa ki Lopozisyon pa’n dir pep Seselwa se ki aktyelman i annan en gran deba Moris lo sa size privatizasyon. Sa n’anmenn en kantite lagrev e mekontantman parmi lapopilasyon. En kantite dimoun i’n perdi zot travay. An zeneral Moris bann union  travayer zot kont privatizasyon ki serten gro biznes pe fors gouvernman fer san okenn respe pour drwa dimoun pour travay. Ozordi servis lapos Moris i’n privatize kont santiman bann travayer. La i posib ki servis elektrisite e delo i kapab privatize, e sa bann union travayer e konsomater pa dakor avek. Sekter prive laba i oule met lanmen lo tou servis esansyel e lafreyer se ki travayer a perdi zot lanplwa e konsomater a pey plis pour elektrisite e delo. Mwan mon pa konnen si pep Seselwa i oule ki nou fer en privatizasyon an brit pour larg lapos, PUC e lezot servis esansyel dan lanmen bann gro biznes prive. Nou tou nou konnen ki en monopoli prive i pli danzere ki en monopol leta, apre tou leta se lepep, sa ki pour leta i pour Seselwa. Fodre nou al dousman e mezir lefe sak ketsoz ki nou liberalize. Sa ki nou devret fyer se ki en lakonpanyen Seselwa n’aste en lakonpanyen Morisyen dan lendistri touris.     

Mon aksepte ki nou bezwen moderniz nou lekonomi, nou bezwen fer li. Nou bezwen annan en prosesis liberalizasyon e privatizasyon, me nou bezwen fer lib yen avek sazes, assess son lefe, regard son timing e ki manyer nou fer li pour ki son konsekans pa afekte byenet pep Seselwa. Nou bezwen fer li an liny avek plan ki monn deza elabore, en progranm detaye e dan la transparans.                   

Nou en pti pei 82,000 dimoun avek gran lekspektasyon, kot sa ki pli for i atrap lanmen sa ki pli feb, kot zanfan sa labourer li osi i kapab vin en dokter si nou kontinyen donn li loportinite en bon ledikasyon, kot en fanmiy i kapab viv dan en bon lakaz ki petet zanmen i ti pou arive gannyen lo limenm. Se sa ki fer nou gouvernman en gouvernman lepep, en gouvernman ki met dimoun avan larzan, en gouvernman ki depans ozordi pour asir en bon lavenir. Napa byen byen pei omonn kot i’n annan redistribisyon larises osi ekitab parey isi Sesel. Dan sa dernyen 10-an nou’n depans R2 bilyon dan ledikasyon, R1.5 bilyon roupi dan lasante, R1.35 bilyon dan lakaz e sa i’n permet 9000 fanmiy antre dan zot prop lakaz.Plizyer milyon n’al dan proze land bank. I vre si nou pa ti fer sa ti pour napa defisit, me plizyer mil fanmiy ti pour ankor dan move kondisyon lozman.

Nou pa’n gaspiy larzan, mesye Lopozisyon. Nou’n fer difisit akoz nou’n permet nou zanfan devlop zot lentelizans, zot talan. Nou’n gard nou dimoun an bonn sante. Nou’n donn meyer swen ki nou kapab isi e aletranze, malgre ki nou bezwen fer zefor pour amelyore. Nou’n donn zot en twa lo zot latet, nou’n donn zot lalimyer, delo, servis modern, eksetera, eksetera. I annan telman mon kapab enimere.

Pour mwan se sa redistribisyon larises ekitab e non pa met en montany rezerv labank.

Konpasyon

Msye St Ange i koz lo konpasyon, ki gouvernman napa konpasyon akoz i’n entrodwi en nouvo sistenm taks dan kad nou reform ekonomik.

Msye Spiker, mwan koman Minis Finans parfwa mon al visit bann pti kominote partou Cap L’Elephant,  Leo Capucins, dan Bodamier, Bougenvil, leo Takamaka, Bel Ombre, Praslin, La Digue, Anse Boileau.  Mon vwar bezwen nou dimoun dan bann pti kominote. I annan en kantite proze ki ariv kot Minister Finans pour finanse, pa zis lakaz, i osi annan bann semen segonder, proze delo, e lezot ki benefisye lakominote. Parfwa nou vot en larzan pour anvway dimoun trete deor, e souvan pandan lannen i annan plis pasyan ki ti’n prevwar, alor demann anplis pour bidze. Nou pa’n azir koman Robin Hood, nou’n fer nou mye pour ed bann real people pour ki zot osi zot vwar amelyorasyon dan zot lavi. Pour mwan se sa konpasyon pour nou dimoun.

I osi konpasyon ler nou ti entrodwi sistenm sekirite sosyal pour nou dimoun aze e bann ki dan bezwen sosyal. I osi konpasyon, en laform redistribisyon larises, ler nou ti acquire e aste bann gran propriyete e vann a en pri tre bon marse avek bann fanmiy ki ti napa later ek lakaz. Avan preski tou bann gran propriyete Sesel ti dan lanmen zis 25 a 30 gran fanmiy. Msye St Ange i konn tre byen pour ki ti bann pli gran propriyete Pointe Larue, Au Cap, Anse Royale, Bougainville, Anse Forbans, Intendence, Anse aux Poules Bleues, Anse a la Mouche, Barbarons, Port Launay, Cap Ternay, Beau Vallon, Glacis, eksetera. Ozordi plizyer fanmiy i annan zot pti morso later e zot lakaz nef lo la. Sak drayver taksi i annan son prop taksi olye anplwaye avek en Msye ki annan taksi, ler pti garson e pti fiy Josephine i ganny loportinite devlop son lentelizans, son kapasite pour li vin en avoka, en dokter, eksetera.  Pour mwan se sa konpasyon. E la koman nou lo size propriyete e byen piblik, monn tande devan sa Lasanble ki dimoun ki’n ganny ketsoz bon marse e swa dizan pour nanryen pour rann kont. Les mwan dir zot ki sa bann later avek semen ki nou’n vann 30,000, 60,000 roupi, 80,000 e 100,000 dan land bank, bann lakaz lo bann housing estate, i osi petet pour nanryen ler ou konpar pri en kare later ki pe vann dan prive. Mon pa konnen si zot apel sa osi Robin Hood, e si zot pour fer sa bann dimoun osi rann kont.

Lespwar pour lavenir

Nou dan SPPF nou pour kontinyen avek nou progranm, me nou bezwen fer li dan en fason pli efikas akoz i ankor annan fanmiy ki pe esper en lakaz, pour touzour annan zanfan ki pou al lekol, pour touzour annan pasyan pour trete, pour touzour annan zenn ki fer byen dan sport enternasyonal, e pour touzour annan zenn ki oule lans zot pti biznes.

Msye Spiker, mon kontan koz lo lavenir akoz mon annan lespwar pour lavenir e konfyans dan pep Seselwa, e dan lazenes Seselwa, dan zot kapasite analize, dan zot lentelizans e zot talan, ki nou sistenm i permet zot devlope.

Enn bann ketsoz ki mon pe al konsantre lola lannen prosenn se sa nouvo sistenm konpreansif  pansyon nasyonal  ki Prezidan ti anonse, e ki a donn nou travayer en sours finansman sibstansyel ler zot pran zot retret. Sa nouvo pansyon a depan lo kontribisyon ki zot e zot anplwayer i fer e a anplis ki sa pansyon 63-an.

Mon dakor ki i annan nesesite pour gouvernman vin pli efikas, ki manm lo kote mazoriter i’n koz bokou lola. Parey monn deza dir ler pei i prodwi plis larises nou kapab ganny plis larzan pour donn en pli bon servis, me fodre osi redwir gaspiyaz e aret fer sabotaz. Mon antyerman dakor avek zot. Delivery dan gouvernman i kapital pour nou meet nou bann development targets. Gouvernman i bezwen fer en zefor spesyal pour redwir inefikasite e fer dimoun ki dan pozisyon ki ansarz vin pli accountable. Sa latitid lese-fer fodre eliminen. Dimoun ki travay ek gouvernman i bezwen perform, annan plis responsabilite e vin pli konsyasye. I annan bokou ki fer zot louvraz byen, me i annan serten malerezman pe fer malis zot kanmarad, prensipalman pour rezon politik. Mon donn mon langazman ki mon pour fer tou sa ki mon kapab pour anmenn plis lefikasite dan gouvernman e donn en meyer servis piblik a lavenir.    

Lasirans

Mon oule redonn lasisrans ki pour annan materyo pour peser e fermye. Pti biznes pour kontinyen ganny lasistans akoz zot fer en gran kontribisyon dan sekter prive. Lapolis e departman prizon pe ganny plis larzan akoz nou oule lape ek lord dan nou pti kominote.

Msye Spiker, a sak fwa ki mon ganny lokazyon mon ankouraz nou dimoun partou dan bann distrik e dan bann lorganizasyon pour partisip dan devlopman nou pei. Msye Jolicoeur i’n koz lola dan son lentervansyon e nou kwar ki partisipasyon i efektiv pour fer nou dimoun konpran pli byen e apresye koman gouvernman e prosesis devlopman i marse.     

I annan en meyer lavenir devan nou. Larzan ki nou ti depanse yer i dan sa bann ketsoz ki nou pe zwir ozordi. Nou annan en kantite lakaz ankor pour fer lo later ki nou’n konble. Plizyer santenn fanmiy pour kontan a zot tour. Nou deza en model pour Lafrik e lemonn, sa i devret pous nou pour fer plis akoz devlopman pa zanmen fini. Devlopman i en prosesis kontinyel.

Konklizyon

Msye Spiker, pour terminen mon tia kontan renouvle mon lapel pour tou Seselwa met latet ansanm, met zepol ansanm, annou annan sa grander d’espri, travay pour Seychelles, nou Seychelles. Nou bezwen fer li ansanm. Nou bezwen aret ise bose, sakenn son kote, san kwa nou pa pour ariv lwen. Bann ki pa oule annou les zot deryer e annou kontinyen lo nou larout apre zot a vin zwenn nou ler zot a vwar ki nou pe avanse. Zot a vin donn nou en koud’men zot osi.

Mon kwar en kantite dan partisipasyon, dan konsiltasyon, dan kontribisyon tou dimoun. Sa i en prosesis ki neseser pour nou kontinyen kree sa nouvo Seychelles modern pour benefis nou pep an antye. I pour kontinyenm reste mon stratezi alavenir. Ozordi mon santi sa patriyotism pe devlope dan lamazorite nou pep, sa sans responsabilite e devwar ki neseser pour nou devlop bann valer pozitiv.

Ansanm annou kapab fer li. 2003 pe al terminen e byento nou pe al komans en nouvo lannen, en lannen avek defi ki a donn nou tou Seselwa loportinite pour rise to the challenge e sirmont bann difikilte avek en sans realis e responsabilite. Nou konnen kot nou ti sorti, nou konnen kot nou’n arrive ozordi e nou konnen kote nou pe ale. Nou lobzektif i kler devan. Nou lespwar i la, nou kapasite i la, nou determinasyon i la. Annou avanse ansanm ver en lavenir meyer pour Sesel e pour nou tou. Mon profit lokazyon pour mwan swet Msye Spiker, Manm Lasanble e tou pep Seselwa en Zwaye Nwel e en bon lannen travay  ki a anmenn nou plis prosperite. 

Mersi.   

LINKS