Lapolis in raporte ki zot pe kontinyen avek zot lanket pour retrouv dimoun ki responsab pour sa doub mert ki ti arive pandan wikenn Majoie.

Pandan ki de trwa endividi pe ede dan lanket, bann ekspert pe kontinyen avek travay entansif dan landrwa kot sa 2 mert in ganny konmet.

Lapolis in osi raporte ki zot pe fer serten travay lo en pick-up, propriyete sa 2 viktim, ki ti ganny retrouve dan distrik Mont Fleuri Dimans le 12 Zanvye swar.

Lapolis i sispekte ki mertriye sa 2 viktim ti'n servi sa transpor pour sov ladan apre ki zot ti'n fini konmet zot aksyon kriminel.

Antretan lapolis pe demann nenport dimoun ki annan lenformasyon ki pou ed zot anmenn sa ki responsab pour sa doub mert devan lazistis pour pa ezite kontakte biro CIU, stasyon lapolis Santral.

Dan sa lensidan doub mert ki ti arive swa pandan lannwit Sanmdi le 11 Zanvye oubyen Dimans le 12 Zanvye granmaten, de zonm lorizin Endyen – Velayathan Vivekananthan Padayachy, aze 40 an, e Subramaniam Rajathurai Pillai, aze 68 an – ti ganny trouve mor Dimans le 12 Zanvye, bomaten dan en lakaz parlao stor Krishna Mart.

LINKS