Minis pour Zafer Sosyal ek Lanplwa, Msye Dolor Ernesta, in dir pour ki bann travayer lo Uemployment Relief Scheme (URS) i annan en lavenir, zot bezwen ganny serten formasyon ki pou lans zot dan en travay permanan.

Andot mo, sa formasyon pou ed zot annan sa ki nou apel en sekirite lanplwa, Minis ti dir.

Minis Ernesta ti fer sa deklarasyon pandan sesyon demann kestyon dan Lasanble Nasyonal Mardi bomaten, swivan de kestyon separe par Onorab Barry Faure ek Robert Georges lo ki pou arive avek bann travayer ki lo URS.

Minis ti dekri URS koman en "pasaz" ki pe ed bann zenn garson ek fiy e ki asire ki zot pa pe ganny kite deryer akoz bann prosesis devlopman ki pe arive.

I ti azoute ki atraver bann lannen, en kantite zefor in ganny fer pour asire ki bann travayer ki pas atraver URS zot kapab ganny en travay permanan atraver serten formasyon ou laprantisaz.

I ti donn legzanp serten zenn ki'n pas atraver formasyon domestik e ki'n plitar ganny anploye swa konman travayer domestik ou dan bann lotel.

An se moman, Minis Ernesta ti fer resorti, Centre for Skills Development (CSD), ki tonm anba son minister, pe ofer diferan progranm laprantisaz tel parey pour mason, sarpantye, mekannisyen, elektronik, refrizerasyon ek enstalasyon elektrik, e zot pe aktyelman fer demars pour entrodwir bann tel proze laprantisaz dan sekter lagrikiltir, maritim ek tourizm.

Menm bann zenn lo Praslin ek La Digue pe ganny enkorpore dan sa proze pour sekter tourizm e byento en progranm pou ganny lanse pour zot, i ti azoute.

Anplis ki sa, Minis ti fer resorti, zot osi annan serten progranm formasyon avek plizyer lorganizasyon non-gouvernmantal avek ki zot in tradisyonnelman travay de tre pros, tel parey Karitas ki konsantre bokou lo lakoutir ek labrodri.

Minis ti answit dir ki zot osi dedye serten zefor pour donn bann partisipan serten skil adisyonnel pour ed zot letan zot al rod en travay, spesifikman fer intervyou. I ti osi note ki bokou zenn ki atase avek CSD, i vin atase avek diferan sekter konstriksyon e atraver zot progranm laprantisaz, zot ganny loportinite pour zot ganny anploye.

An pasan, Minis ti osi nonm Landscape Management ki baze State House e dir ki i annan en progranm formasyon entansif sirtou la kot demann i bokou dan lendistri tourizm. Swivan zot formasyon, bann partisipan i swa ganny anploye anba diferan divizyon Minister Lanvironnman oubyen zot ganny mete dan diferan landrwa travay.

Onorab Faure ti osi demande si i annan plan pour anploy aplentan bann travayer sosyal tel parey bann ki travay avek Homes For the Elderly.

Minis ti dir ki i annan de group travayer ki travay kot bann lenstitisyon parey e enn parmi se bann ki bezwen donn en koudmen. Zot pa bann travayer sosyal ki anploye avek minister me zot plito tonm anba URS e zot ede anba sistenm Home Care. Menm bann dimoun ki tonm anba progranm lanbelisman dan distrik i vin donn en koudmen, Minis ti fer resorti.

LINKS