Lapolis i raport en seri latak arme

Lapolis in raporte ki pandan sa de dernyen zour in annan en seri latak arme kot bann agreser in servi mask.

Depi Lendi apremidi ziska Mardi granmaten stasyon lapolis Victoria ti raport senk diferan lensidan kot dimoun arme dan mask i antre dan lakaz ouswa letablisman touristik pour atak bann endividi e vol zot posesyon.

Dapre Jean Toussaint, Zofisye Relasyon Piblik kot Lapolis, dan premye lensidan ki ti arive Lendi, en garson ti ganny atake par trwa dimoun arme avek kouto dan zanmerant popriyete Allied Builders, Le Rocher. Sa trwa zonm ti reisi aras sa garson son sak, en telefonn mobil ek R300.

Dan en lot lensidan ki ti ariv menm zour, ankor de dimoun dan mask ti antre dan en laboutik Mont Buxton avek lentansyon pour vole. Me erezman ti annan lezot dimoun dan sa laboutik ki ti anpes sa trwa zonm fer okenn aksyon endezirab.

Lapolis ti raport lezot trwa lensidan Mardi granmaten kot dimoun arme dan mask ti antre dan trwa lakaz avek lentansyon vole. Dan premye ka, dimoun maske arme avek en kouto ti antre dan lasanm de kliyan ki ti pe reste Lazare Lodge, Baie Lazare ver minwi e vol de bag.

Dan en lot lensidan en pti pe plitar en zonm Mare Anglaise ti sibir blesir dan son lanmen ek son manton apre ki i ti’n lalit avek en dimoun maske ki ti’n kasyet dan larmwar dan lasanm. Sa zonm in admit lopital. Sa dimoun maske ti osi annan dan son posesyon en dager.

Anmenmtan, dan en lot lensidan separe trwa zonm maske ti antre dan en lakaz Sans Soucis e vol en telefonn mobil, seten kantite bizou parey zano, lasenn likou ek bag. A sa moman ti annan zis en madanm dan sa lakaz.

Msye Toussaint ti dir ki sa sitiasyon in toultan egziste isi menm si laplipar bann ka ti bann izole, me in fer remarke ki tou dernyenman in annan en logmantasyon dan sa kalite latak.

Msye Toussaint in osi dir ki lefe ki sa kantite lensidan i’n ariv dan lespas 24 er-d-tan i fer lapolis tre konsernen.

« Alor lapolis pe fer son mye pour travay lo bann ka ki’n ganny raporte e detekte bann ki responsab e anmenn zot devan lazistis. Me fodre fer remarke ki sa i devret konsern tou dimoun e non pa lapolis selman e nou pe demann manm piblik pour pran byen detay lo mouvman serten dimoun ki zot krwar pa abitye frekant serten landrwa,” Msye Toussaint ti dir.

In osi dir ki mazorite bann ka vol ki’n ganny raporte depi komansman lannen in ganny detekte e an se moman i annan bokou ka devan lakour.

Dapre Msye Toussaint i enkyetan pour vwar ki bokou bann ka vol ek lezot aksyon vyolan pe ganny komet par bann zenn aze ant 16 a 18 an.

LINKS