Partisipan pandan rankont anyel Lasosiasyon Paran-Animater

Neighbourhood Recreational Activities (NRA) pou sa lannen organiz plizyer nouvo aktivite avek bi fer sa mouvman pli vivan e pli ganny apresye par bann zanfan.

Sa ti enn parmi plizyer rekomandasyon ki bann manm Lasosiasyon Paran-Animater (Parents Animateurs Association of Seychelles (PAAS)) ti met devan pandan zot rankont anyel ki ti fer resaman.

Sa rankont, ki ti deroul dan Sant Kominoter Bel Ombre, ti ganny asiste par Olsen Vidot, sekreter prensipal dan divizyon Gouvernman Lokal e osi bann manm sa lasosiasyon sorti dan tou rezyon atraver pei, ki enkli Santral 1 ek 2, Sid-Was, Les, Nor ek Zil Pros.

Pour reisir dan sa misyon, PAAS in kree en nouvo komite - NRA Development Committee - , ki regroup diferan lazans parey Minister Lanvironnman ek Lasante, Konsey Nasyonal pour Sport (NSC), Konsey Nasyonal pour Lar (Nac) e plizyer lezot lorganizasyon non-gouvernmantal ki travay avek bann zanfan.

Koman son priyorite sa nouvo komite pou non selman revwar pli bon fason pour amelyor kalite aktivite ki NRA i organize pour bann zanfan me i pou osi entansifye bann progranm ki deza pe ganny fer.

Enn parmi sa bann nouvo aktivite, ki ekspekte komanse pandan vakans Avril, i en proze organize an kolaborasyon avek Minister Lanvironnman, ki annan pour bi fer bann zanfan vin pli konsyan lenportans zot lanvironnman.

Dan son prezantasyon, Daniel Kallée, direkter Devlopman Progranm dan divizyon Gouvernman Lokal, ti dir ki sa lasosiasyon i ekspekte kree en group kiltirel ki pou konpri bann zanfan ki dan NRA. Atraver bann latelye, manm sa group pou kapab aprann diferan kalite form lar e sa ava prepar zot pour plitar sa lannen partisip dan en mini festival kreol ki sa lasosiasyon pou organize.

Atraver NSC bann zanfan dan NRA pou kontinyen reviv bann zwe tradisyonnel e lo son kote Minister Lasante pou ed sa mouvman avek bann progranm sansibilizasyon lo obesite, ki komen parmi bann zanfan.

Msye Kallée ti reasir bann manm PAAS ki departman gouvernman lokal pou kontinyen donn sa lasosiasyon tou led ek sipor neseser ki i kapab pour fer marse sa lasosiasyon e in osi lans lapel pour ki i annan plis partisipasyon dan bann rankont ki ganny organize.

Dapre Msye Kallee i annan en bezwen pour formaliz bann striktir lo nivo distrik pour fer ki bann diferan progranm ek proze i materyalize e kree sa lenpak.

A sa pwen i ti demann lotorite distrik pour angaz zot lekor dan prosesis pour anmenn progranm NRA pli lwen malgre serten defi.

Avan sa prezantasyon par Msye Kallée, Militna Marie, tyermenn PAAS, ti donn en revi bann aktivite ki sa lasosiasyon ti antreprann lannen pase, tandis ki Brenda Crispin, trezorye PAAS, ti prezant rapor finansyel.

LINKS