Parey labitid konpetisyon kanmtole pou deroul dan diferan kategori laz

Gran final konpetisyon ladans kanmtole, enn bann levennman mazer Festival Kreol,  pou sa lannen deroul le 30 Oktob dan Sant Konferans Enternasyonal.

Parey labitid konpetisyon pou deroul dan diferan kategori ki enkli primer, segonder, group 18-45 an e group 45 an anmontan, e pou enkli bann ladans senp e doub tel ki kotis, kontredans, mazok, polka, parmi lezot ankor.

Dapre kordinater sa konpetisyon, Manmzel Marietta Matombe, konpare avek dernyen festival kot final konpetisyon ti deroul dan lasal SMB, Roche Caiman, sa lannen zot in war nesesite pour fer li dan en landrwa pli gran vi ki sa levennman in vin pli popiler.

Osi diferan sa fwa se lefe ki konpetisyon pou deroul lo en baz rezyonnal.

"Dan le pase nou ti les konpetisyon ouver kot bann konpetiter ti form zot lekip avek danser sorti dan diferan distrik, me nou'n remarke ki lannen apre lannen menm dimoun pe pran par," Manmzel Matombe ti dir.   

Alor bi pour fer li lo en baz rezyonnal se pour donn sans lezot dimoun dan bann distrik ki pa'n zanmen partisipe pour zwenn avek bann ki pli ekperyanse e form en group.

"Nou ki pe travay pour promot ladans tradisyonnel, e sa bann pti azisteman i osi permet nou vwar kwa ki manke e kote nou merit amelyore,"  i ti dir.

Parey labitid konpetisyon pou swiv par en gran disko kreol dan restoran Sea Front. Manm piplik i kapab aste tiket 50 roupi pour konpetisyon selman oubyen 75 roupi pour regard konpetisyon e answit pran par dan disko.

LINKS