Onorab Georges i devwal plak (dan medayon) pour mark louvertir ofisyel nouvo sant kominoter Val D’Endor.

Bann zabitan Val D'Endor in ganny en nouvo sant kominoter ki pou ganny servi non selman pour divertisman me ki pou osi ofer plizyer servis ki pou dan benefis lakominote.

Sa nouvo sant ti ofisyelman ouver par manm lasanble pour distrik Baie Lazare (ki enkli Val D’Endor) Honorab Robert Georges dan en pti seremoni Dimans pase dan kad bann aktivite pour mark 10enm lanniverser gouvernman local.

Osi prezan kot sa seremoni ti Minis pour Gouvernman Lokal, Spor ek Kiltir, lezot o zofisye dan sa minister, ladministrater distrik, bann zabitan ek lezot envite.

Pandan son diskour, Msye Georges ti fer resorti ki sa nouvo batiman pa pou ganny servi zis pour divertisman, me ki i pou osi ofer serten servis de baz ki Minister Lasante i ofer atraver klinik distrik.

I ti fer remarke ki sa sant i osi annan lespas pour en magazen, ki ler i a konmans fonksyonnen i ava en gran led pour bann zabitan.

Anvi ki popilasyon dan kanton i prensipalman bann fermye, lasosiasyon fermye Val D'Endor pou osi annan en biro dan sa batiman.  

Pour terminen Msye Georges ti profite pour remersye gouvernman ki, atraver Minister Gouvernman Lokal, Spor ek Kiltir in kapab finans sa lenfrastriktir. I ti osi annan mo remersiman pour lezot dimoun ki'n asiste dan en fason ou en lot.

Apre seremoni louvertir bann prezan ti ganny sans pour vizit batiman e degiste bann goute tipikman kreol.

Pandan lazournen Dimans ti osi annan en tonbola kot sa sant.

Parmi bann lezot aktivite ki ti’n ganny organize sa zour dan tou distrik pou mark 10an gouvernman lokal ti legzibisyon, spektak kiltirel, disko, eksetera.

LINKS