En zonm i admit lopital avek blesir swivan en latak

Lapolis in raporte ki en zonm 33 an in admit lopital Victoria avek plizyer blesir dan son latet, son lekor ek son lanmen, apre ki i ti ganny atake e bate dan en lakaz ki i ti pe veye Lendi le 26 Zanvye,  Copolia.

Dapre en kominike lapolis, ti ver 11.50 diswar ki 'girlfriend' met sa landrwa ti apel lapolis e demann lasistans. Met sa landrwa pa dan pei.  

Dapre sa madanm sete tapaz keksoz pe ganny kraze ki ti'n deranz son sonmey e ler i ti leve pour vwar ki pe arive i ti trouv sa msye, son protekter, pe lalit avek 2 zonm maske anndan dan lakaz. 

Se a sa moman ki i ti tay kot son vwazen pour rod lasistans.

Sa msye ki'n admit i dir ki i ti pe regard televizyon dan lasanm ler i ti tann vit kraze, e dan son pe regarde ki ti'n arive sa 2 zonm dan mask ti atak li dan koridor. 

Afors lalit avek son 2 agreser i ti ganny sans tay dan lasanm madanm, kraz 'sliding window' e kit lakaz.

En pti baba pa byen formen i ganny trouve dan bin salte

Dan en lot lensidan separe, lekor en pti baba ki p'ankor byen formen in ganny trouve dan en sak plastik dan en bin salte Ma Joie Mardi tar bomaten. 

Dapre lapolis, sa lensidan ti ganny raporte par en zofisye Star Seychelles letan zot ti pe kolekte salte.

Lapolis in dir ki lanket in ouver dan tou lede lensidan e ki ziska ler napa personn ki'n ganny konekte avek sa 2 ka separe.

Lapolis pe demann nenport dimoun ki annan okenn lenformasyon lo sa 2 lensidan pour pa ezite vin devan.

LINKS