De milyon roupi in ganny depanse resaman pour aste lekipman lapes pou ed bann peser lokal dapre William Herminie, minis pour lagrikiltir ek resours maren.

Minis Herminie ti fer sa lanons an repons en kestyon poze par Onorab Barry Faure, manm lasanble pour distrik Anse Royale, konsernan plan sa minister pou met a disponibilite bann peser materyo e lekipman neseser.

Minis ti anonse ki sa bann materyo, ki enkli lasenn, lalinny, masin bato e radyo, pou ariv dan pei tre byento.

Minis ti osi azoute ki 10,000 dolar (50,000 roupi) pou ganny servi pou refourni stok lanmson e pour lannen prosenn 400,000 Euro (2 milyon 400,000 roupi) pou ganny depanse pou aste lekipman neseser pour peser.

De son kote, Onorab Nicholas Prea, manm lasanble pou distrik Bel Ombre, ti demann minis ki son minister pe fer pou konbat fleo mous fri ek mous blan ki pe enfeste bann plant dan pei.

Minis ti dir ki son minister pe konsantre lo resers pou rod metod pli efektiv pou detrir sa de pes ki pe abes rekolt dan prodwi agrikol.

Pou reponn kestyon lo size sekirite pour bann peser Anse Etoile demande par manm lasanble sa distrik, Anne Marie Mathiot, minis ti dir ki an Mars sa lannen lalimyer ti ganny enstale dan lapas pou fasilit mouvman bann bato peser.

Sesyon lasanble Mardi  25 Novanm ti osi dernyen sesyon demann kestyon pour lannen 2003. Plis ki 500 kestyon in ganny demande sa lannen.

LINKS