Lanmor pti baba trwa mwan

Rapor medikal i montre ki ti annan labi seksyel

Minister Lasante in fer sorti en rapor ki endike ki sa pti fiy trwa mwan ki ti mor semenn pase ti'n ganny abize seksyelman dan son parti prive osi byen ki par deryer.

Swivan sa, lapolis in anonse ki zot pou lans en lanket dan sa zafer.

Dan en rapor ki zot in donn lapolis, Minister Zafer Sosyal in dir ki zot ti sispekte ki in annan labi seksyel dan sa zafer apre ki zot in egzamin bann domaz ki'n arive avek lapo sa zanfan dan sa de landrwa.

Lapolis in dir ki i kler dan rapor Minister Lasante ki se sa bann labi seksyel ki'n enfekte sa pti baba, e ki in evantyelman mor avek lemoni e septicemia.

Minister Lasante in rann lekor sa pti baba avek son paran yer bomaten.

Orizinalman, lapolis ti fer sorti en kominike konmkwa ki sa pti baba ti'n mor senpleman avek lemoni.

Me zis avan sa pti baba ti pe al ganny antere, Minister Lasante ti rod en lord lakour atraver Prokirer Zeneral, pour fer plis egzaminasyon.

Komisyoner Lapolis, Msye Andre Quilindo, in dir ki i pou komans par apel paran sa pti baba, e plitar i ava fer konn progre son lanket, probableman atraver en konferans-de-pres, ansanm avek Minister Zafer Sosyal ek Minister Lasante.

LINKS