Anviron 30 poursan dimoun ki annan drwa vote in enspekte zot non lo lalis voter pandan legzersis lanrezistreman sa lannen ki ti komanse Merkredi le 14 Zanvye e terminen Mardi le 27 Zanvye.

Dapre sef zofisye lanrezistreman, Msye Anaclet Tirant, sa sif i tre pozitif konpare avek lannen pase kot selman 18 poursan dimoun ti al enspekte rezis.

Bann sif rikorde pandan sa legzersis pour 2004 i montre ki en total 18,598 dimoun in pran par dan lanrezistreman voter e pli gran nonm dimoun, 3,540 an total, ti raport kot bann stasyon Mardi le 27, dernyen zour lanrezistreman.

"Manm piblik in tant pour vin enspekte rezis plis pandan bann dernyen zour," Msye Tirant ti dir.

I ti osi azoute ki sa in kre enpe lenkonvenyans anvi ki dimoun i bezwen esper lontan dan laliny, ouswa serten menm pa'n ganny sans fer bann koreksyon apropriye avek zot bann detay vi ki zot pa'n vin avek zot bann dokiman neseser.

Sa bann sitiasyon parey, Msye Tirant ti eksplike, in osi met en kantite presyon lo bann zofisye.

Lanrezistreman voter in dir pour de semenn, e menm si depi boner kanpanny ti'n lanse atraver medya pour sansibiliz dimoun pour vin enspekte zot non, premye semenn  legzersis ti deroul enpe dousman avek selman en total 1,425 dimoun pour tou distrik. Laplipar dimoun in desann pandan bann dernyen zour.

Annefe Msye Tirant in fer remarke ki ti menm annan stasyon ki ti bezwen reste ouver apre 7er diswar pour benefis bann dimoun ki ti ankor dan laliny kot stasyon.

Msye Tirant ti profite pour lans en lapel avek manm piblik pour dan lavenir vin tyek zot non pli boner pour evit bann tel sitiasyon.

Msye Tirant in dir ki pandan sa de semenn ki dimoun in ganny sans al enspekte zot non in annan bokou sanzman ki'n ganny fer, sirtou an sa ki konsern transfer sorti dan en distrik pour al dan en lot.

I ti osi fer remarke ki in annan enn de pti problenm dan bann ka kot serten dimoun in konteste ki zot pa tonm da en tel distrik, me dapre Msye Tirant sa in ganny rezourd par fer sa dimoun siny en dokiman konmkwa sa lenformasyon ki i pe donnen i korek e bann zofisye biro komisyon eleksyon pou plitar al verifye.

Fodre fer resorti ki i en lofans anba lalwa pour donn fo lenformasyon pandan en legzersis lanrezistreman.

Aprezan ki lenspeksyon lalis par bann dimoun in fini, pour biro komisyon eleksyon latas i kontinyen pour al verifye tou san bann sanzman avan ki rezis voter i ganny sertifye e aprouve.

Msye Tirant in osi remersye tou bann dimoun ki'n fer zot devwar ensi ki bann anplwayer ki'n met bann zofisye dan distrik a dispozisyon biro komisyon eleksyon.

LINKS