Lapolis pe rod de zonm ki ti atak en madanm avek en pistol tandis ki en lot zonm in ganny arete an koneksyon avek en lensidan kot 100,000 roupi in ganny raporte vole kot en "warehouse" Providence.

Dan sa premye lensidan, en kominike lapolis i eksplike, de zonm maske dan legan ti rantre dan lakaz sa madanm Pointe Larue ver 8er diswar Mardi le 1 Zilyet. Enn ti annan en pistol dan son posesyon.

Sa zonm ki pa ti arme ti atrap sa madanm pandan ki lot ti diriz dan lasanm.

A en serten moman apre ki sa zonm ti'n sorti dan lasanm, sa madanm ti debat e lalit ek zot e la i ti ganny sans retir zot mask e klerman idantifye son ataker.

Sa madanm ti kriye e son de ataker ti taye.

Dan zot mannev pour sot en miray zot pistol ti tonbe e reste deryer.

Dan sa lot lensidan "manager" Warehouse Chez Deenu Providence in raport avek lapolis ki ti anviron 5.30 apremidi Mardi le 1 Zilyet, ki enn zot travayer ti antre dan zot lofis avek en kouto e pran en sak dan ki ti annan 100,000 roupi.

Dapre lapolis, en lot travayer Endyen ki ti la letan sa lensidan ti arive in raporte ki apre ki sa zonm ti'n fini vol larzan e sorti, li i ti fer letour e la i ti vwar en lot zonm arme avek en kouto deryer "warehouse.

Ler zot ti remarke ki sa Endyen ti'n trouv zot, zot ti sove.

Enn ant sa de zonm ti ganny arete plitar.

LINKS