Santez Octavie Prosper ki pour en pe letan nou’n tann li pe akonpanny plizyer artis parey Jean Marc Volcy, Hudson Dorothe, Francois Havelock e lezot, pe aktyelman prepare pour lans son premye albonm solo avek tit Pour Lavi.

Sa zenn santez i dir ki sa i en rev vin vre akoz parey nenport ki santez li osi i ti pe rev sa moman.

Son nouvote pou konpri en koleksyon 10 sanson ki’n ekrir par diferan artis tel ki Jean Marc Volcy, Hudson Dorothe, Francois Havelock e osi li menm. I bann sanson ki sa zenn santez in deza sante lo albonm diferan santer oparavan.

Dan en pti antretyen, Octavie ti fer resorti ki i ti pe target son travay pour Festival Kreol vi ki son bann sanson i an relasyon avek sa lokazyon. Me ler lekipman ti deranze kot stoudyo Veuve i ti bezwen aret fer lanrezistreman. Octavie ti dir ki de ki Veuve i repran travay son albonm pou konplete e al lo marse posibleman boner sa lannnen.

I ti fer resorti ki pour en pe letan son bann fàns ti pe montre lentere ki tou sa bann sanson ki in sante avan i sorti lo en sel albonm pour ki zot ganny en koleksyon.

“Mon'n pran tou sa bann sanson ki mon'n sante depi avan e mon'n met zot ansanm lo en sel CD,” i ti dir e azoute ki i tre eksite avek sa proze e i espere ki son bann fàns ava apresye son premye koleksyon.

Octavie in ganny akonpannyen lo son albonm par bann mizisyen renonmen tel ki Peter Jules, Tony Julie, Bruce Freminot e Danny Jules.

LINKS