Lapolis in donn detay lo de lensidan ki'n arive resaman e ki'n size gran kontrovers dan serten lapres lokal.

Premye i konsern sirkonstans lanmor en zonm apre ki transpor ki i ti ladan ti brile Praslin.

Lapolis in dir ki dapre lanket k'in fer in etabli ki Leta pa responsab pour sa lensidan ki ti arive Pointe Cabri Praslin ki ti koz lanmor Msye Claude Monnaie. Msye Monnaie ti mor an Out apre ki i ti'n fer en mwan dan Younit Swen Entansif apre ki pick-up ki i ti ladan ti brile.

Port Parol Lapolis, Msye Jean Toussaint, ti dir avek lapres yer ki lapolis ti reisi koz avek Msye Monnaie pandan ki zot ti pe fer zot lanket, avan ki i ti mor, me i pa ti dir zot nanryen ki ti kapab etabli ki sete Leta ki ti responsab.

Dapre Msye Toussaint lanket in terminen dan sa zafer e lapolis pa'n osi kapab etabli kwa ki'n koz sa dife.

Msye Toussaint in osi rezet alegasyon ki'n ganny pibliye dan zournal Regar e Le Nouveau Seychelles Weekly tou resaman konmkwa ki lapolis ti bat Msye Robert Arrisol kot diskotek Barrel an krwayan ki i ti Allen Camille.

Arrisol ti ganny ranmase lo Freedom Square Sanmdi le 22 Novanm par en zofisye lapolis ki ti'n sorti en fonksyon e transporte lopital kot i ti ganny admit dan Younit Swen Entansif avek blesir dan son latet e dan son figir.

Dapre Msye Toussaint sete sa zofisye ki ti idantifye Arrisol koman Allen Camille akoz dapre li zot annan en gran resanblans.

Lapolis in ouver en lanket dan sa lensidan.

LINKS