Lapolis in raporte ki 2 zenn-onm, enn sorti Cascade e lot sorti Copolia, ti ganny arete Vandredi le 6 Zanvye,  lo erport apre ki zofisye lapolis ek ladwann ti dekouver 8 blok hashish dan zot bagaz.

Dapre en kominike lapolis sa bann drog ti'n ganny byen anpakte dan "masking tape" kouler kaki e sa bann pake ti'n ganny kole dan fon 2 valiz. Dan en pti valiz ti annan 3 blok e dan en lot valiz pli gro ti annan 5 blok.

Sa 2 garson, ki ti antre Seychelles vandredi bomaten lo vol Air Seychelles sorti Mumbai, Lenn, ti pas an-kour yer menm e zot in ganny plase an detansyon stasyon lapolis santral ziska Lendi le 9 Zanvye.

Lapolis in antretan ouver en lanket swivan sa dekouvert.

Fodre note ki si sa 2 deteni i ganny trouve koupab pour lenportasyon ek trafik drog ilegal, zot riske fer fas avek santans maksimonm 10 an prizon oubyen 200,000 roupi lanmann pour sak sarz separe.

LINKS