"Ozordi i en lokazyon pour nou fer refleksyon lo lakonplisman ki bann madanm in fer dan tou sekter devlopman nou pei. Bann polisi ki gouvernman in etabli in permet e pe kontinyen donn loportinite bann madanm ansanm avek bann msye pour devlop zot potansyel atraver nou sistenm ledikasyon e formasyon e answit permet zot ganny en travay dapre zot kalifikasyon e bezwen nou pei. Akse bann madanm avek nou sistenm lasante e servis sosyal i osi en gen formidab dan zot lepanouisman ek nou devlopman nasyonal.

"Ozordi nou pe fer fas ek bann defi lo plan ekonomik e sosyal kot nou bezwen redres nou sitiasyon ekonomik e anmenntan konbat bann fleo sosyal tel ki vol, bann ka mert, vyolans domestik e propagasyon HIV/Aids. Alor mon demann bann madanm pou travay kot a kot avek bann msye e reponn lapel mesaz Prezidan Rene lo Renesans Moral pou promouvwar e pratik bann valer ki esansyel pou annan lape, larmoni e progre e osi byennet tou Seselwa. Bann madanm ensi ki bann msye, nou tou nou annan en rol pour zwe pour anmenn plis lanmour, konprenezon, tolerans, dyalog, lespri lekip e fraternite dan nou pei.

"Pour sa lazournen, Nasyon Ini in swazir tenm "Fanm e HIV/Aids". Seychelles pan'n ganny eparnye par sa fleo. Depi zanfan, zenn fiy e garson, zonm ek fanm, e bann pli aze in ganny afekte. Konsekaman bokou plis fanmiy ki ganny afekte. Dan lalit kont sa fleo, in annan en partenarya ekselan ant Gouvernman, bann NGOs e sekter prive kot nou konplemant zefor kanmarad pour aport swen nou bann viktim. Sa i legzanp en partenarya ki nou devret kontinyen promouvwar. Mon oule eksprim mon lapresiasyon pour devosyon bann madanm dan zot kapasite koman bann profesyonnel oubyen volonter, dan lalit kont sa maladi e son bann lefe negativ sosyal. Dan sa konteks mon demann bann fiy ek bann madanm pour kontinyen edik zot lekor lo danze sa maladi e kontinyen promouvwar bann valer lanmour, senserite e langazman dan lakour pour sofgard non selman lasante lafanmiy me osi lasante nou kominote an zeneral.

"Pour asir sikse dan nou devlopman koman en nasyon e soutenir e amelyor nou nivo lavi, nou bezwen garanti devlopman potansyel maksimonm bann madanm. Sa i posib pa zis atraver bann loportinite ki gouvernman i met a zot laporte me osi atraver relasyon ant bann msye ek madanm dan fanmiy. Dan sa relasyon napa plas pour vyolans domestik e labi lalkol e labi skesyel. Dan sa relasyon i annan en kantite plas pour partaz responsabilite paran pour elve zanfan pour vin bann bon sitwayen.

"Finalman, mon ti a kontan osi demann bann msye pour pran en moman e reflesir lo kwa ki nou kapab fer pour donn plis sipor bann madanm. Annou reflesir lo respe e lapresiasyon ki nou pe donn zot swa dan lantouraz nou fanmiy, dan travay oubyen dan kominote. Andotmo, mon demande ki nou bann msye nou montre plis tolerans anver bann madanm, ki nou respe zot swa, zot lopinyon e zot desizyon. Annou sezi lokazyon lannen Renesans Moral pour donn en nouvo lelan lafason ki nou konplemant zefor bann madanm dan promosyon bann bon valer sosyete dan devlopman nou pei.

"Mon pran sa lokazyon pour swet bonn fet a tou bann madanm."

LINKS