Group Koket i la pour met lanbyans

Group Koket an aksyon pandan dernyen Zwe de Zil, Moris

Pandan 6enm Zwe de Zil Moris (depi le 29 Out ziska le 7 Septanm) ti vwar nesans en group apele Koket. Manm sa group ti al Moris pour ede met lanbyans e ankouraz nou bann atlet kot bann sit zwe.

Zot sipor ti sitan presye ki bokou pa ti pe ekspekte. Memm bann lapres rezyonnal i'n koz lo zot e dir ki zot prezans ti en lafors an plis pour nenport ki adverser.

Menm apre Zwe de Zil, sa group i'n deside reste pour anmenn lanbyans en pe partou.

Anfet, sa group i tourn otour de (2) zanmi garson – Nigel Mirabeau ek Elvis Mellie.

Zot ti komans par siport tim volibol fanm Cascade pandan tou son bann rankont kot Palais des Sports. Apre, lezot dimoun i'n zwenn sa group e zot i'n frekant Stad Linite ek Stad Popiler pour siport bann tim foutbol.

En portparol sa group i'n dir vi ki zot sipor ti vreman esansyel pandan Zwe de Zil Moris, group Koket pou tre aktiv kot bann konpetisyon sportif e zot in deza komans ganny demann pour perform dan diferan fonksyon prive parey maryaz ek piknik.

Avek larive Festival Kreol, group Koket pou osi parmi bann ki pou anim plizyer aktivite organize pandan sa festival.

Tou resaman, manm piblik i'n kapab vwar group Koket an aksyon kot basketbòl dan Palais des Sports e ozordi zot ekspekte vin siport lekip foutbol Seychelles ki pou zwe kont lekip Zanbi dan kalifikasyon pour Lakoup Lemonn 2006.

Akoz en tel non? Dapre en manm sa group, zot in deside apel zot lekor Koket, lefe ki sa plant i ganny konsidere koman en lafresisan ki geri e fer en dimoun reganny son lasante.

Sa i vedir ki letan bann lekip Seselwa pe perdi, sipor Koket i ed zot retourn pli for dan zwe pour fer laviktwar.

Touzour dapre sa manm group, zot apresye letan bann atlet i remersye zot pour zot sipor.

LINKS