26enm  Lazournen Enternasyonal Mize

Mize Nasyonal i reviv tradisyon atraver legzibisyon

Viziter kot legzibisyon “Telegraf Mouswar

Alokazyon 26enm Lazournen Enternasyonal Mize, Mize Nasyonal in met an valer serten tradisyon Seselwa atraver en legzibisyon apele " Telegraf Mouswar".

Sa legzibisyon, ki pe deroul kot Sant Kiltirel Nasyonal, i montre en varyete mwayen kominikasyon silansye an servan mouswar ki ti ganny pratike par bann zanset pour fer pase en mesaz, zot panse oubyen santiman. Par egzanp, en mouswar anmare otour likou en dimoun i vedir ki sa dimoun i anmoure.

Prezan kot louvertir ofisyel sa legzibisyon ti direkter zeneral pour kiltir dan Minister Gouvernman Lokal, Spor ek Kiltir, Madanm Raymonde Onezime, travayer mize ek lezot envite.

Ler i ti pe adres bann prezan, Madanm Onezime ti koz lo sa nouvo tenm 'Mize e leritaz entanzib' ki komite mize enternasyonal in swazir pour selebre sa lazournen sa lannen . I ti dir ki zot satisfe avek en tel tenm anvi ki responsab dan divizyon kiltir ek komite nasyonal bann moniman ansanm avek lezot komite leritaz pe travay dir pour protez leritaz kiltir Seselwa dan tou son laform, swa tanzib ou entanzib.

"Gras a nou zanset, nasyon Seselwa in erit en leritaz remarkab e enteresan," i ti dir.

Madanm Onezime ti osi fer resorti ki Mize Nasyonal pou byento mont en lot legzibisyon e prodwi en nouvo piblikasyon lo bann diferan krwayans ki bann zanset ti annan e pratike dan tan lontan.

I ti demann tou sitwayen Seselwa pour pran zot responsabilite pour ede protez bann leritaz ki bann zanset in kit deryer pour ki zenerasyon fitir i a kapab apresye sa larises.

I ti dir ki minister kiltir i ankouraz kreasyon bann mize prive e pour atenn sa lobzektif, Mize Nasyonal pe travay lo en polisi ki pou vin en gidans ofisyel pour tou mize dan pei.

Sa legzibisyon "Telegraf Mouswar" pou reste ouver ziska Vandredi le 21 Me.

LINKS