Dan kad Festival Kreol sa lannen Latroup Nasyonal in met an-senn en pyes teat titre Temwen pour Prosekisyon.

Sa pyes i en tradiksyon liv Witness for the Prosecution orizinalman ekrir par ekriven Agatha Christie.

Se Andy Jean-Louis, en manm Latroup Nasyonal, ki'n tradwir, adapte e met an-senn sa pyes.

Temwen pour Prosekisyon i ekstre en zistwar kot en madanm, Mary Bradford, i ganny trouve mor kot son rezidans. En sispe i ganny met an detansyon. Zafer i an-kour e trwa avoka, en ziz e kat temwen pa kapab vwar lazistis pour sa zafer, vre lazistis set-a-dir.

Dapre Msye Jean-Louis, lide pour fer sa pyes ti vin apre ki i ti'n lir sa liv. Ansanm ek son koleg Jany de Letourdie zot ti deside pour komans travay lo adaptasyon e met an- senn sa pyes.

"Temwen pour Prosekisyon i en dram serye ranpli avek sispans formile pour en lodyans ki pou osi temwanny zafer ler i pas an-kour," Msye Jean-Louis ti azoute.

Travay lo sa pyes, ki ti komanse lannen pase, in aprezan preski konplete avek antou 13 akter ki enkli wit manm atitre Latroup Nasyonal ensi ki 4 lezot akter non-atitre.

Msye Jean-Louis ek Manmzel de Letourdie ti osi fer resorti ki zot in resevwar bokou led ek lakour siprenm par rapor avek bann prosedir zidisyer ki enkli bann diferan terminolozi ki zot devret servi pandan zizman.

Msye Jean-Louis ti anmenmtan dir ki la i moman ideal pour fer sa pyes teat an vi en logmantasyon dan lakantite lensidan krim ek vyolans dan pei tou resaman.

I ti dir ki sa i en fason pour fer lepep Seselwa reflesir lo sa size.

Pyes teat Temwen pour Prosekisyon pe ganny zwe pour dimoun 12 an anmontan e gran premyer i le 28 Oktob pour envite selman. Piblik pou kapab vwar sa spektak le 29 ek le 30 Oktob osi byen ki le 7 ek le 8 Novanm.

Tou spektak pou konmans 7er diswar dan Teat Nasyonal Mont Fleuri.

LINKS