Delegasyon Lasanble Lazenes pandan zot rankont avek Minis Meriton

Minis pour Zafer Sosyal ek Lanplwa, Vincent Meriton, in dir ki i annan nesesite pour sansibiliz bann zenn ki lo URS (Unemployment Relief Scheme) lo lenportans pour annan en lanplwa permanan.

Minis Meriton ti pe koz pandan en rankont ki i ti fer resaman avek serten manm Lasanble Lazenes, kot son lofis dan batiman Unity House.

Minis Meriton ti eksplike ki bi sa scheme sete pour ed bann zenn ki pa’n ganny aksepte dan bann lenstitisyon pos segonder pour ganny serten training pandan en peryod 6 mwan dan serten domenn parey enzenyer ek sekreter afen ki plitar zot a ganny en lanplwa permanan. Me malerezman pour plizyer rezon apre 6 mwan serten zenn i vwar zot ankor lo sa scheme.

An se moman i annan plis ki 300 zenn ki lo sa scheme pour plis ki en an e sa i fer ki sa scheme pe perdi son lenportans.

Sa rankont ti osi asiste par Madanm Antoinette Alexis, sekreter prensipal pour Zafer Sosyal; Jean Raguin, direkter zeneral Lanplwa, ki ti pe ranplas sekreter prensipal pour Lanplwa, Madanm Marjaw MacGaw ki pa ti dan pei.

Sa delegasyon 9 dimoun, dirize par Speaker Lasanble Lazenes, Clifford Andre, ti ganny  leksplikasyon lo rol ek fonksyon diferan divizyon dan Minister Zafer Sosyal ek Lanplwa. Sa rankont ti osi moman pour bann zenn onorab rod klarifikasyon avek bann zofisye konsernen, lo plizyer size ki afekte sirtou bann zenn ou zanfan parey Unemployment Relief Scheme (URS), tribinal lafanmiy, prizon, Youth Residential Treatment Centre (YRTC),  parmi lezot.

Dan son prezantasyon Minis Meriton ti dir ki zot pou kontinyen travay an etrwat kolaborasyon avek sekter prive pour ankouraz kreasyon lanplwa pour bann zenn e anmenmtan zot pe travay lo en stratezi pour akouraz dimoun ki’n ariv 63 an pour aret travay.

Sa rakont avek bann zofisye Minister Zafer Sosyal ek Lanplwa i enn dan en seri ki bann zenn onorab in deza komanse depi lannen pase e pou kontinyen sa lannen.

Dapre Msye Andre sa bann rankont i tre enportan e ava permet annan plis dyalog ant bann diferan minister ek bann zenn onorab.

"Prezan nou ava pli byen ekipe pour donn bann lezot zenn lenformasyon ki korek lo fonksyonnman ek rol diferan minister," i ti dir.

Dapre Msye Andre apre zot premye rankont ki zot ti fer lannen pase avek zofisye Minister Ledikasyon ek Lazenes, serten zot bann demann in ganny adrese e zot swete ganny larepons pozitiv sorti kot lezot minister.

LINKS