Selman trwa semenn apre ki en konpreser ti ganny vole kot klinik Les Mamelles, en lot in raporte manke kot Lenstiti Nasyonal pour Lasante ek Letid Sosyal (NIHSS), Mont Fleuri.

Sa lensidan ti ariv kot seksyon letid danter ver 4er bomaten Mardi le 27 Avril,  ler sekirite kot lopital ti tann tapaz anler kot lekol e i ti al verifye.                          

Dapre Cynthia Sanders, en ansenyan letid danter kot sa lenstitisyon, sa sekirite ti apersevwar senk dimoun pe pran sa konpreser. I ti azoute ki anvi ki ti annan senk zot kont li tousel, i pa ti kapab fer nanryen. I ti dir ki zot ti menm menas li ek zouti.

Alor i ti napa lot opsyon me notifye son siperyer e apre lapolis.  

Madanm Sanders ti dir ki i ti aprann detay sa lensidan mardi bomaten ver 7er 50 par de son etidyan.

“Mon pa ti oule tro krwar me ler mon ti arive mon ti vwar pour mon menm ki zot ti’n lev konpreser antye e al avek. Pour pran sa konpreser, zot in kas kadnan,” Madanm Sanders ti dir.

An se moman i annan 8 etidyan ki pe fer letid danter kot NIHSS e zot dan zot dezyenm lannen letid.

Touzour dapre Madanm Sanders, labsans sa konpreser, ki’n kout zot apepre 13,800 roupi, pou retard zot travay bokou, anvi ki sa i fer marse tou zot bann lekipman ensi ki servi par bann etidyan pandan sesyon pratik ki fer toulezour.

Madanm Sanders ti osi dir ki in pran zot apepre enn an pour ganny sa konpreser e i malere ki in ganny vole selman de mwan apre ki in ganny enstale.

Minister Lasante pe ankor enn fwa lans en lapel avek manm piblik an zeneral pour respekte bann propriyete ki ganny met a zot dipozisyon kot lopital e ki pe osi servi pour benefis kominote.

LINKS