En group travayer lasante pe met lanbyans

Plis ki en santenn ners, dokter ek lezot travayer lasante ti ralye Vandredi 24 Oktob aswar dan lakour Minister Lasante pour en sware kiltirel kot zot ti reviv ansanm e partaz ek lezot ki pa familye ek nou kiltir, bann moman lazwa en nasyon Kreol.

Pour enn fwa ou pa ti santi sa loder latizann ki normalman akey ou ler ou vin kot lopital, me en parfen byen zepise bann pla tradisyonnel ki ti fer delo vini dan labous. Sa ti enkli manyok bwi, satini reken byen for, kari koko pwason sale, plizyer kalite ladob, pour nonm zis enn de.

Lanmizik pirman tradisyonnel parey kanmtole, ensi ki resital romans ek zedmo, ti osi lo progranm pour lasware.

Fodre dir ki se bann ners ek dokter zot menm ki ti anim sa sware, en aktivite ki ganny organize tou le-z-an par klib ki responsab pour bann aktivite sosyal dan minister Lasante pour selebre Festival Kreol.

LINKS