Fidel sorti dan tou kwen Mahe ti asiste lanmes Anse Royale alokazyon Lafet Travayer Sanmdi

Per David Alcindor in demann tou dimoun pour travay ansanm pour byennet nou pei.

"Parol Bondye i dir ki par travay, nou pe servi nou kominote, nou pe servi lezot, nou pe servi nou sosyete, nou pe servi nou pei e sirtou nou pe servi Bondye," Per Alcindor ti dir dan son lapres pandan lanmes solanel Sanmdi le 1 Me, dan legliz Anse Royale pour selebre Lafet Travayer.  

Parey tou le lannen, Lafet Travayer le 1 Me – ki koensid avek lafet patronal St Joseph, Anse Royale, patron tou bann travayer – ti ganny selebre par en gran lanmes.        

Sa lannen, vi ki legliz i anba renovasyon, lanmes ti ganny selebre dan en lasapel akote e menm si landrwa ti en pe pti, en gran lafoul dimoun sorti dan tou kwen Mahe ti'n zwenn pour sa zour spesyal.             

Per  Alcindor ti demann bann dimoun prezan pour mazin bann travayer ki devoue e ki travay dir pour zot ganny rekonnet dan zot profesyon.                            

I ti osi demann tou travayer Seselwa pour zwenn ansanm pour reponn lapel Prezidan James Michel pour travay ansanm malgre zot diversite e diferans lopinyon.

I ti eksprim swe ki dan sa nouvo letap politik ki Seychelles i ladan, tou politisyen i zwenn ansanm pour esey travay ansanm pour fer nou pei avans devan.

“Mon ti a kontan demanm tou travayer pour travay senserman e pour pa anmenn politik dan travay,” Per Alcindor ti azoute.

Pandan son sermon, Per Alcindor ti fer rapel ki le 1 Me i sa zour pour rekonnet valer travay dan lavi en dimoun e dan lasosyete, e ki travay i devret vin koman en lazwa e non pa en fardo.

“I annan nou ki ler nou leve bomaten nou dir, ‘Ar wi Senyer mon pe al travay ankor ozordi,’ Me non! Nou travay i devret vin konman en kesoz ki fer nou kontan, ki kontribye pour nou devlopman personnel, mantal e osi kontribye pour nou epanouisman,” Per Alcindor ti dir.                      

Apre lanmes, lazournen ti kontinyen avek en tonbola kot en varyete stòl manze – gato mayok, moukat, briani, pwason griye, kari zourit, rougay sosis eksetera – e rafresisman ti anvant. Larzan ki ranmase avek lavant sa bann keksoz pou al dan fon reparasyon legliz.

LINKS