"Ozordi a-lokazyon Lazournen Enternasyonal Madanm, i avek bokou plezir ki mon swet bonn fet a tou bann madanm ek zenn fiy.

"Le 8 mars in vin en zour istorik ki ganny selebre partou atraver lemonn. I fer nou rapel lalit e langazman bann fanm pour byennet lazistis sosyal.

"Isi Seychelles, nou bann madanm nou fyer akoz nou annan nou dignite, nou lib pour nou bann swa. Me nou osi konsyan ki i annan ankor bokou pour fer.

"Anliny avek deklarasyon lannen 2004 koman lannen Renesans Moral par Prezidan France Albert Rene, mon oule lans en lapel avek tou bann madanm Seselwa pour ki nou fer li nou langazman personnel pour vin bann model pour bann ki pli zenn e enstil dan zot ek nou zanfan bann bon fason viv.

"Dan la sosyete Seselwa, bann madanm in toultan annan en rol avangard dan ledikasyon e lepanouisman bann zanfan. Alor nou osi annan en rol enportan pour zwe pour asir revalorizasyon valer moral dan lafanmiy, lakominote e lasosyete an zeneral. Fanm i en lafors dinamik e nou kontribisyon e rol aktif dan devlopman sosyal, ekonomik, politik e kiltirel nou pei in grave dan nou listwar.

"Mon demann zot alor pour nou reste ini, determinen e met zefor ansanm avek bann zonm, ki ansanm nou a kapab sirmont sa defi pour ki bann bon valer kin soutenir nou pep tou dilon son listwar i reste fondasyon nou progre nasyonal.

"Mon swet tou madanm e zenn fiy bonn fet. Annou kontinyen travay avek kouraz e determinasyon pour devlopman e progre nou sosyete."

LINKS