Lefe ki tou dernyenman pei pe eskperyans sezon lapli e pour plizyer lezot rezon, komite lorganizasyon Konpetisyon Lanbelisman 2002/2003 in anonse ki i pe prolonz dat lanrezistreman pour sa konpetisyon.

Dapre en manm sa komite, Madanm Mary Stravens, dernyen dat pour retourn avek bann form laplikasyon kot sekretaryat oubyen kot biro ladministrasyon distrik, ki ti'n fikse pour ozordi le 15 Zanvye, in aprezan anvoye pour le 31 Zanvye.

I ti dir ki sa ava donn bann ki ti ava anvi partisip dan sa konpetisyon plis letan pour prepar zot vi ki pei pe eksperyans sezon lapli e lefe ki serten zot ti okipe pandan bann peryod festivite ki'n fek pase.

Me Madanm Stravens in tou-d-menm dir ki form lanrezistreman ki antre plitar ki le 31 Zanvye pa pou ganny aksepte.

Konpetisyon Lanbelisman 2002/2003, ki konpri plizyer kategori tel ki lakour ek biznes, in sa lannen vwar lentrodiksyon en nouvo kategori apele Adopted Area oubyen Kwen Adopte.

Dapre Madanm Stravens sa nouvo kategori, ki annan pour bi ankouraz partisipasyon lamas dan kominote e konsyantiz plis dimoun lo lenportans annan en lanvironnman prop e zoli, i vize ver diferan group dan kominote tel ki klib foutbol, kominote peser, group zenn, en group travayer dan diferan lorganizasyon, eksetera.

I ti eksplike ki sa bann group i kapab adopte en landrwa spesifik oubyen en rejected area pour anbelir e fer li vin pli zoli.

Dernyen dat pour retourn form lanrezistreman pour sa kategori i le 28 Fevriye e Madanm Stravens in dir ki sa dele letan i neseser pour donn bann group plis letan pour travay lo zot adopted area, vi ki sa kategori i enn nouvo.

Apre ki tou form in fini ariv kot sekretaryat, manm komite pou tir portre sa landrwa kot sak group in adopte pour zot kapab konpar sanzman apre ki zizman i fer lannen prosenn. Konman en manm komite lorganizasyon sa konpetisyon, Madanm Stravens in osi reasir manm piblik ki menm kantite larzan i ganny depanse lo kategori distrik ek kategori nasyonal. I ti eksplike ki anviron R100,000 i ganny depanse pour sak sa de kategori me lo nivo nasyonal i annan plis gannyan vi ki sak distrik i annan 3 pri pour sak kategori.

Fodre fer remarke ki bann diferan konpetisyon pour sa lannen i enkli lakour, biznes ek distrik e ki sak sa bann konpetisyon i annan plizyer lezot sou-kategori.

Madanm Sravens in osi fer kler ki an premye lye sak sa bann kategori pou ganny zize lo nivo distrik e si en gannyan sak sa bann kategori i ganny 60% pwen ou plis i pou otomatikman kalifye pour pran par dan konpetisyon lo nivo nasyonnal. I ti eksplike ki menm si en partisipan i sorti premye dan nenport sa bann kategori sa pa vedir ki i pou otomatikman kalifye pour konteste avek lezot gannyan lo nivo nasyonal.

"I esansyel ki sa partisipan i ganny 60% ou plis pwen pour ariv lo sa nivo pour partisip dan konpetisyon lo nivo nasyonal," i ti dir.

Fodre fer rapel ki bann gannyan kategori lakour i ganny pri larzan tandis ki bann gannyan kategori biznes i resevwar trofe. Lo kote bann gannyan enter-distrik, zot pri i depan lo kontribisyon bann sponsor.

Dapre Madanm Stravens, sa komite in deside pour amelyor konpetisyon lo nivo enter- distrik e enkli bann nouvo kriter. Enn parmi se ki bann distrik pou ganny zize lo bann laspe komen tel ki lanvironnman dan bann landrwa spesifik tel ki kot legliz, lekol, landrwa rekreasyonnel e plizyer lezot. Sa, i ti dir, se akoz dan lepase zot in resevwar konplent lo fason zize.

Bann partisipan ki pe pran par dan kategori lakour lo nivo distrik pou annan drwa partisip dan en sel kategori. Par egzanp en lakour ki pe partisip dan kategori gran zarden pa pou kapab partisip dan kategori balkon anmenmtan. I ti osi fer distenksyon ant balkon ek lavarang, an dizan ki lavarang i anba tandis ki balkon i trouvo anler avek lavarang bann lakaz ki annan letaz.

LINKS