Zenn poet Kenneth Pierre in lans son premye koleksyon poenm pour zanfan.

Apele Larkansyel sa pti liv i kontenir 31 poenm an Angle, Franse e Kreol pour zanfan aze 3 a 10 an. Bann poenm i akonpannyen par bann desen tre kolore.

Kenneth in dir ki sa liv poenm i ava ed zanfan dan zot laprantisaz Kreol lekol osi byen ki kot lakour. 

Parmi sa bann poenm serten i tre komik e rimen osi byen ki edikasyonnel, kot zanfan i a vwar laprantisaz pli enteresan. 

Kenneth, ki osi en etidyan kot Lenstiti Nasyonal pour Ledikasyon (NIE), i vwar ki i annan en mank sa bann kalite liv kot bann lekol.

Sa pti liv i kout selman 25 roupi e ou kapab aste ou kopi avek Kenneth limenm ouswa pran kontak lo nimero telefonn 766706.

Sa zenn, ki osi en manm lasosiasyon bann ekriven, IROGRIF, e ki'n ganny nominen de fwa konsekitiv an 2002/2003 konman meyer poet, in anonse ki byento i pe osi al lans en koleksyon bann poenm lanmour pour adilt avek tit Mysteries of Love.

Kenneth  ti a kontan remersye Marvelle Estrale, Juliette Elizabeth, son fanmiy, legliz St Jean, bibliotek nasyonal e tou dimoun ki'n ed li dan en fason ou en lot  pour zot sipor ek gidans.

LINKS