Apre sikse Lo later e Rekonsilye, de sanson ki trouve lo son premye albonm, Pascal Ally i met en dezyenm travay lo marse, safwasi avek tit Pa ziz mwan.

Pascal i dir ki in pran li apepre de-z-an pour konplet tou travay a en pwen kot limenm li personnelman i satisfe.

Sa albonm 10 sanson i en koleksyon ki varye ek diferan stil lanmizik tel ki sega, seggae e zouk.

Pascal in dir ki in prefere sant dan sa bann stil lanmizik akoz i sorti enpe dan nou kiltir e reflekte lanmizik nou bann zanset.

Lo sa nouvo albonm manm piblik i ava ganny sans tann bann sanson tel ki Lakle, Lavi so e Manman Cheri, parmi lezot.

"Mon bann sanson i baze plis lo diferan laspe lavi tel ki diskord dan fanmir, problem relasyon ant zonm ek fanm, divizyon e bann problenm lager dan lemonn," Pascal ti dir.

Lo tou son bann sanson Pascal i ganny akonpannyen par santez Shelda Williams apard lo enn ki Romina Hoareau i sant ek li.

Sa santer in azoute ki in fer fas avek plizyer problenm pandan ki i ti pe travay lo sa albonm me afors persevere, in reisi konplet son dezyenm CD.

Enn parmi bann difikilte ki Pascal in rankontre i trouv letan pour li fer lanmizik. In menm bezwen sanz son karyer koman kwizinyen pour li travay koman en drayver kot lakonpannyen transpor SPTC pour li kapab byen manye son letan travay e osi sante.         

Pascal, en Pralinwa me ki baze isi Mahe, in eksprim bokou satisfaksyon anver bann zenn artis ki pe monte, me in dir ki i ti a swete ki menm si nou pe evolye dan lanmizik modern bann zenn artis i kontinyen devlop nou lanmizik tradisyonnel. 

LINKS