Varyete gou dan dimans kreol borlanmer

Mont poto lagres ti parmi bann latraksyon dan Dimans Kreol Borlanmer

Ti dan en latmosfer tipikman kreol ki aktivite Dimans Kreol Borlanmer ti deroule Dimans 26 Oktob lo lans Beau Vallon, kot en bon nonm dimoun ti'n desann pour vin pas en lazournen detant avek fanmiy ek zanmi.

Bokou ti pe profite pour degiste sa bann gou rar tel ki nouga bannann, asar e plizyer pla ankor.

Anvant ti en varyete lobze artizanal ki ti atir bokou touris osi byen ki Seselwa.

Aktivite ki ti atir en gran lafoul dimoun ti konpetisyon mont poto lagres.

Malerezman bann aktivite sportif lo delo ki ti lo progranm ti bezwen kennsel vi ki letan pa ti favorab.

Pour met lanbyans lo kote lanmizik ti group Zez. Avek bann lenstriman tradisyonnel tel ki vyolon ek benndyo, zot ti akonpanny santer tel ki Fred Savy ki ti enterpret bann sanson kreol lepase.

Dan bann kwen dan zalantour, dimoun ti'n antoure pou apresye sa detrwa pti group ki ti pe perform diferan stil lanmizik ek bann lenstriman tradisyonnel parey bonm.

Sa lazournen ti termin ver 6er diswar, ler bann ki ti la ti donn randevou pour en lot Dimans Kreol Borlanmer lannen prosenn.

LINKS