"A-lokazyon Lazournen Enternasyonal Madanm, Komisyon bann Madanm isi Seychelles i sezi sa loportinite pour swet tou bann madanm seselwa e osi lezot nasyonalite en bon lafet.

"Sa zour nou devret fer refleksyon tre enportan lo ki mannyer nou bann madanm in arive fer sikse e osi war nou bann febles. Nou devre fer sa dan en fason pozitiv ki kapab gid nou pour al annavan e fer fas avek lavi ki parfwa i ase difisil.

"Dan nou pei, i ankor annan serten madanm ki dekouraze e trakase par lefet ki zot napa en travay e si zot annan enn, zot lenkyetid se ki travay pa enn ki stab e permanan. Dan laplipar sa bann ka, nou trouv bann madanm ki zot bann paran tousel e ki pe esey fer tou pour kapab fer viv e elev zot zanfan.

"Se pourkwa i tre neseser pour lezot ki pli fortinen, pour pa oubliy zot e montre par nou aksyon solidarite ki nou pare pour ede kan i neseser e kan nou kapab fer li.

"Dan lemonn, i annan bann madanm ki zot sitiasyon i bokou pli pir. Bokou zot, zot fer fas avek bann sirkonstans ki zot pann zanmen rode oubyen kontan me ki zot trouv zot ladan tel ki:

- war ki zot bezwen deplase pour al rod lezot landrwa pour zot viv san vreman konnen kote zot pe ale e ki pou arive avek zot

- ganny separe avek zot zanfan e osi lezot manm lafanmiy akoz lager

- fer fas avek maladi parey Sida ki bokou fwa i anmenn lanmor kot zot lakour

- reste san manze e san en bon lakaz dan bokou ka

- ganny abize seksyelman pandan lager

- ganny tortire san rezon e bokou lezot ankor.

"Pour zot osi, nou devret pe fer refleksyon lo zot sitiasyon e mazinen si nou ti pou kontan war nou pe pas dan menm sitiasyon. I vre ki nou isi, nou pa pou kapab fer bokou pour ed zot, me sa ki nou kapab fer, se montre nou solidarite a tou moman e osi kan nou kapab fer li, anmenn led oubyen lezot soutyen pour nou bann ser. Si nou pran letan pour mazin lo sa bann sitiasyon tre seryezman, nou pou trouve ki i annan fason ki nou kapab rantre pour ede sov omwen en lavi, parmi sa kantite ka.

"Komisyon Bann Madanm i demande ki nou mazin seryezman lo sa mesaz e espere ki nou bann madanm, nou zwenn ansanm pandan sa lannen pour fer pli gran refleksyon ek diskisyon profon ansanm lo sa size avek bi pran bann aksyon konkret."

LINKS