Dan son lentervansyon Sanmdi swar pour mark lafen kanpanny lider Fron Progresis Pep Seychelles (SPPF), Msye France Albert René, ti eksplik rol ek lenportans sa eleksyon pour Lasanble Nasyonal, e ti demann pep Seselwa pour pa fer sa fot pour "balans latab", parey lopozisyon pe demande.

Msye René ti fer kler ki sa eleksyon pa pou sanz Gouvernman vi ki i zis pour elekte bann manm Lasanble Nasyonal. Me i ti dir ki pour ki Gouvernman i kapab fonksyonnen, i bezwen annan sipor Lasanble.

"Se sa lenportans sa eleksyon ki nou pou annan semenn prosenn (sa semenn)", i ti dir.

I ti analiz pwen par pwen tou bann propagann lopozisyon an eksplikan larealite e ki kalite ditor i pou anmenn Seychelles.

Dan sa konteks, i ti dir ki sa kestyon balans latab i viz tou senpleman pour anpes Gouvernman fer son travay.

"Ki savedir balans latab ? Ki zot oule ? Mon krwar ki pep Seselwa i bezwen realize ki sa ki zot oule, se pa balans latab. Sa ki zot oule, se annan en mazorite dan Lasanble Nasyonal. Akoz ki zot oule sa ?", Msye René ti demann sa avan i eksplike : "Lopozisyon i konnen ki pandan sa 5 an ki devan nou, progranm SPPF pou anmenn Seychelles lwen lwen devan, e lopozisyon i oule aret sa a tou pri", i ti dir.

Pour sa rezon, i ti averti pep Seselwa ki si i fer sa fot pour donn mazorite avek lopozisyon, sa "i pou fer nou en gran ditor".

"I pou kree destabilite dan nou pei e i pou anmenn vyolans alafen. Mazinen ki pou arive si lopozisyon i annan en mazorite e anpes Gouvernman pas son bidze ! Rezilta, se ki Gouvernman pa pou kapab pey son travayer. I pa pou kapab pey pansyon dimoun. I pa pou kapab fer marse lopital, ni bann lekol, e pep Seselwa pa pou konnen ki mannyer i pou fer pour li viv", i ti dir.

Oparavan i ti afirmen ki sa lesey pour blok tou keksoz ki SPPF i fer i dan disan lopozisyon.

"Zot in esey anpes nou ganny sa lón 150 milyon dolar ki nou'n rode pour devlop Seychelles. Zot in kont nou tenk Seychelles Pride. Zot in kont an fe tou keksoz ki SPPF in propoze e fer dan lepase", i ti fer rapel.

Abordan sa kestyon viktimizasyon ki lopozisyon i kontan koz lo la, Msye René ti demande : "Dir mwan, konbyen siporter SNP ki annan e ki pe viv dan bann zoli lakaz ? Demann zot lekor, konbyen siporter SNP ki pe travay dan Gouvernman ? I annan menm en bann ki okip bann pozisyon ase o dan Gouvernman. Akoz zot pa ganny met deor? Si ti annan viktimizasyon, nou asir zot ki sa bann dimoun pa ti pou la. Viktimizasyon in vin konman en baravan", i ti dir.

I ti donn de trwa lezot legzanp pour montre ki i napa okenn viktimizasyon dan sa pei.

Dan son lentervansyon Sanmdi, lider SPPF ti osi koz lo problenm "housing". I ti dir ki napa trik ki pa'n ganny fer lo televizyon e lo radyo pour detourn lespri dimoun.

"SNP in fouy dan tou kwen Seychelles pour rode ki kote i ankor annan en pti geto. In menm tir portre en bonnonm anba ros. Laverite, se ki ozordi i reste de trwa geto dan Seychelles", i ti dir.

"20 an pase, mazorite lakaz Seychelles ti bann geto. Ozordi, laplipar i bann zoli lakaz ki Gouvernman SPPF in fer pour son pep", i ti fer rapel, avan i promet ki dan 5 an pou nepli annan ni enn sa bann geto dan Seychelles.

An sa ki konsern devlopman lekonomi pei, Msye Rene ti dir ki kontrerman avek SPPF, parti SNP napa okenn lide ki i pou fer pour Seychelles apard promet peser pour fer zot ganny pansyon a laz 55 an, e promet Seselwa ki i pa pou demann zot pour repey zot lón.

I ti dir ki SPPF i annan en plan e en progranm ekonomik pour anmenn Seychelles devan e fer Seychelles reste sa bizou ki lemonn antye i rekonnet e admire. E dan sa plan, i ti dir, i annan en plas pli enportan ankor pour fer sekter ekonomik kapab partisipe e kontribye dan en fason serye.

Lo promes SNP pour demann IMF pour ed Seychelles rezourd son bann problenm i ti dir:

"Pep Seselwa, zour ki IMF i met lanmen lo nou, nou pti pei i fini. IMF vedir devaliasyon. Si ou annan 10 mil roupi dan labank ozordi, lannmen ou pou annan zis 5000", i ti averti.

"Nou pou bezwen aret nou progranm sosyal. Bliye pansyon dimoun aze ! Bliye sistenm 'home carer' !. Bliye 'means testing' ! Bliye ledikasyon pour nanryen ! Bliye sa sistenm lasante ki nou annan ozordi !. Adye sa Seychelles ki nou konnen ozordi", i ti dir.

Me dapre Msye René, pep Seselwa pa foubet pour les SNP fer sa.

I ti dir vi ki lannen pase SNP pa'n kapab pas par laport devan akoz lepep Seselwa in met son konfyans dan SPPF pour prosen 5 an, sa lannen i pe sey antre par laport deryer.

"Nou pa pou les li. Seselwa pa pou les personn bat son latet", i ti dir.

Alafen son lentervansyon lider SPPF ti envit tou Seselwa pour fer sir ki zour eleksyon e menm apre, ki napa okenn vyolans.

LINKS