Enn bann performans ladans pandan Selebo Sanmdi swar

Manm piblik ti kapab apresye ladans ek lanmizik kreol dan tou son varyete e diversite pandan Selebo ek Sware Sega Sanmdi 25 aswar lo Stad Lanmizik.

Sa de spektak ti annefe form parti bann aktivite 18enm edisyon Festival Kreol ki ti ofisyelman lanse pli boner sa menm zour pandan en seremoni dan Stad Popiler.

Sa lannen Selebo ti diferan avek bann ki'n abitye fer dan le pase anvi ki i pa ti lo en baz konpetitiv. Me sa plizyer group danser ek dansez ki ti an aksyon ti ganny vreman apresye par lafoul. Dan bann kostim pirman kreol e tre kolore, en varyete group tel ki Latroup Nasyonal, Miskaden, Anse Boileau, Alpha One e menm LBG's sorti La Digue ti vreman met lanbyans dan stad. Bann partisipan ti demontre kiltir en pep kreol dan bann ladans tre ritme e tradisyonnel tel ki kanmtole, sega e osi montre bann stil ladans ki zenn i pratike konmela.

Lanbyans pa ti fini la. Apre Selebo sete en Sware Sega – nouvo lo kalandriye sa festival – ki ti anim lasware. Benn Storm ti pe akonpanny bann santer Seselwa tel ki François Havelock, Simon Amade, Marc Dubel ki ti pe enterpret en varyete sanson kreol. Pour met plis laganm ti annan performans ladans par bann larenn sega sorti dan group Lapo Koko ek Sitronnel.

LINKS